Ում ձեռքին է Գագիկ Խաչատրյանին պատասխանատվության ենթարկելու զենքը
ՊԵԿ նախագահի տեղակալ Ռաֆիկ Մաշադյանը կրկին հայտնվել է լրատվամիջոցների ուշադրության կենտրոնում, քանի որ բացահայտվեց նրա եւ վարչապետի տիկնոջ՝ Աննա Հակոբյանի բարեկամական կապը: Հիմա հասկանալի է, թե ինչու Մաշադյանը հեղափոխությունից հետո նշանակվեց ՊԵԿ տեղակալի պաշտոնում, այն ժամանակ էլ հանրային մեծ վրդովմունք առաջ եկավ՝ ինչպես կարելի է նախկին ռեժիմի ամենաառանցքային պաշտոնյանին կարեւորագույն համակարգում պաշտոն վստահել: Բանն այն է, որ Մաշադյանը ՊԵԿ նախկին նախագահ, Հայաստանի ամենակոռումպացված պաշտոնյայի համբավ ունեցող Գագիկ Խաչատրյանի զինակիցն էր, մտերիմը, լուրեր կան, որ նրանց մեջ նույնիսկ քավորություն կա: Երբ Խաչատրյանը ՊԵԿ նախագահն էր, Մաշադյանը երկար տարիներ զբաղեցնում էր խոշոր հարկ վճարողների վարչության պետի պաշտոնը: Այս տարիներին Մաշադյանի անվան հետ են կապվել բազմաթիվ կոռուպցիոն սկանդալներ և խոշոր բիզնեսներ, օրինակ՝ «Վեգա» խանութների ցանցի հետ կապված կոռուպցիոն գործարքը, նրա անվան հետ են կապվում նաև «Մաշ Ֆարմ» դեղատների ցանցը, «Վենդա ՍՊԸ»-ն, տարբեր ՀԷԿ-եր և Երևան քաղաքում գտնվող տարբեր անշարժ գույքեր, ինչպես նաև նրան է պատկանում Ծաղկաձորում Գագիկ Խաչատրյանի տան կողքը գտնվող շքեղ առանձնատունը: Եւ այս համատեքստում էր տարակուսելի՝ ինչու են որոշել «նոր Հայաստանում», որտեղ որդեգրել են կոռուպցիայի դեմ պայքարի ռազմավարություն, ՊԵԿ-ում բարձր պաշտոնի նշանակել մի մարդու, ով ժամանակին սերտ առնչություն է ունեցել կոռուպցիոն սկանդալների հետ, հովանավորել է խոշոր բիզնեսի ներկայացուցիչներին և այլն։ Նույն կերպ հարցադրումներ էին հնչում՝ ինչու հեղափոխությունից հետո պատասխանատվության չի ենթարկվում ամենախոշոր կոռումպաված պաշտոնյան, Հայաստանի ամենախոշոր հարուստներից մեկը, եթե ոչ առաջինը, որն ի դեպ, ահռելի ունեցվածքի տեր է դարձել ոչ թե բիզնեսի, այլ պետական պաշտոն զբաղեցնելու ընթացքում: Հայաստանում այդպիսին Խաչատրյանն է եւ եւս մեկ ուրիշը, որի անունը երբեւեէ չի շոշափվել հայկական մեդիայում, քանի որ նա Սերժ Սարգսյանի ամենամերձավորն է եղել: Աննա Հակոբյանի բացահայտումից հետո հասկանալի է դառնում, թե ինչու պատասխանատվության չի կանչվել Գագիկ Խաչատրյանը, չէ՞որ առաջին տիկնոջ բարեկամը Խաչատրյանի հանցակիցն է եղել տարիներ շարունակ, ու Խաչատրյանին պատասխանատվության ենթարկելը կնշանակի նաեւ Մաշադյանին էլ տանել նրա ետեւից: Սակայն դրա փոխարեն, կարծես թե եղել է ճիշտ հակառակը, Մաշադյանը ըստ ամենայնի կարողացել է բարեխոսել Խաչատրյանի համար: Մենք երկու օր առաջ լուր ենք տպագրել, որ Հայաստան է վերադարձել Գագիկ Խաչատրյանը, որը հեղափոխությունից հետո մի քանի ամիս է հեռացել էր անհայտ հասցեով: Անի Սահակյան