Վարդենիսում 73-ամյա կինը կացնով սպանել է ամուսնուն, անդամահատել դիակն ու լցրել երկաթգծի տարածքը

Բաքվից փախած ու Վարդենիսի շրջանի գյուղերից մեկում հանգրվանած ընտանիքում 1998 թվականի օգոստոսին ծանր հանցագործություն կատարվեց 73-ամյա Ոսկի Ն.-ի ձեռքով: Գյուղը սարսռած՝ կատարածի մանրամասներն իմանալով… Ոսկին որբացել էր յոթ տարեկանում: Որբացած աղջկան Ղարաբաղի Մարտունու շրջանից Բաքվի իր տուն էր տարել ու պահել հորեղբայրը: Վատ չէր պահել: Իսկ երբ ժամանակը եկել, ու Ոսկին հորեղբորը ծանոթացրել էր հավանած տղայի հետ, հորեղբայրը դեմ էր կանգնել: Ոսկին պայքարել էր իր ընտրյալի համար: Եվ հորեղբայրը այլևս չէր դիմադրել, միայն ասել էր. «Գնա՛, բայց մեղքը քո վիզը…»: Շատ տարիներ անց ծանր մեղքը, իրոք, շուլալվել էր Ոսկիի «վզին»… Գործով կայացված դատավճռում արձանագրված է. «Ամբաստանյալ Ոսկի Ն.-ի ամուսնական կյանքը հենց սկզբից անհաջող էր դասավորվել: Ընտանիքում կռիվն ու անախորժություններն անպակաս էին: Ամուսինը մշտապես խմել, ծեծել է կնոջը, ստորացրել նրա մարդկային արժանապատվությունը: Կինը հանուն երեք անչափահաս երեխաների՝ տարիներ շարունակ համբերությամբ տարել է ամուսնու բոլոր արարքները…»: Ոսկի Ն.-ն 1978 թվականին՝ դեռևս Բաքվում ապրելու ժամանակ, ամուսնալուծվել էր, բայց նախկին ամուսինները շարունակել էին ապրել նույն հարկի ներքո: 1989 թվականին Ոսկի Ն.-ի ընտանիքը, նաև՝ նախկին ամուսինը, Բաքվից փախել են Հայաստան, բնակություն են հաստատել Վարդենիսի շրջանում: Հայաստանում ամուսինները վերագրանցել են իրենց ամուսնությունը, սակայն նրանց տանը խաղաղություն չի տիրել: Ամուսինը՝ Ռաֆիկը, շարունակել է ծեծել ու ստորացնել կնոջը: Հերթական անգամ ամուսինները վիճել են 1998 թվականի օգոստոսի 4-ին: Ռաֆիկը գոռգոռացել է, հարձակվել կնոջ վրա: Ոսկին գլուխն ազատելու համար տանից դուրս է եկել, սպասել, որ Ռաֆիկը մի քիչ հանգստանա: Կինը տուն է վերադարձել ժամը 22-ի սահմաններում: Հենց տուն է մտել, Ռաֆիկը պառկած տեղից վեր է կացել, գնացել է միջանցք ու վերադարձել է կացինը ձեռքին: «Հիմա քեզ սատկացնելու եմ»,- սպառնացել է Ռաֆիկը, մոտեցել է կնոջն ու բարձրացրել է կացինը: Ոսկին վախից ուժգին հրել ու վայր է գցել դիմադրության չսպասող ամուսնուն: Հետո կուտակված զայրույթը չզսպելով՝ Ոսկին հանկարծակիի եկած ամուսնու ձեռքից խլել է կացինը, սուր մասով հարվածել է Ռաֆիկի պարանոցին: Դրան հաջորդել են ևս 4-5 հարվածներ: Ամուսնուն սպանելուց հետո Ոսկին ցանկացել է թաքցնել հանցագործության հետքերը: Նա որոշել է անդամահատել դիակը: Տուժողի արյունոտ հագուստը հանել, գցել է տան մոտի փոսն ու ծածկել է: Այնուհետև կացնով, սղոցով ու դանակով անդամահատել է դիակը, մարմնամասերը պայուսակով տարել, լցրել է գոմի մոտի՝ 200 լիտր տարողությամբ ջրով լի տակառի մեջ: Այնուհետև Ոսկին, ըստ դատավճռի, լվացել է տան արյունոտ հատակն ու վերացրել է արյան հետքերը: Պառկել է քնելու: Արթնացել է առավոտյան ժամը 6-ի սահմաններում: Ջրով տակառից հանել, պայուսակի ու պարկի մեջ է լցրել սպանված ամուսնու մարմնամասերը, տարել, դատարկել է գյուղի մերձակայքով անցնող երկաթգծի տարածքում… Վերադարձել է տուն, մղձավանջային օրեր է անցկացրել… Սպանության հաջորդ օրը գյուղի երկու անչափահաս տղաներ երկաթգծի տարածքում հայտնաբերել են մարդկային մարմնամասերը… Լուրը արագ տարածվել է գյուղում: Ժամանել են իրավապահները: Հայտնաբերված ձեռքի վրա դաջվածք կար՝ Վարյա… Ռաֆիկի սիրած աղջկա անունն էր՝ երևի նա էլ առաջին սեր էր ունեցել, իսկ Ոսկիի նկատմամբ հիմնականում չարություն էր զգացել… Դաջվածքն օգնել է, որ արագ բացահայտեն՝ ում մարմնամասերն են լցված երկաթգծի տարածքում: Սպանությունը նույնպես շուտով բացահայտվել է՝ Ոսկին համարյա անմիջապես խոստովանել է կատարածը… Ոսկի Ն.-ն մեղավոր է ճանաչվել դիտավորյալ սպանության համար և դատապարտվել է 9 տարի ազատազրկման…