Ում ախորժակն է ավելի մեծ՝ Աննայի, թե Նիկոլի

Ընդամենը մեկ օր առաջ՝ ԱԺ-ում կառավարության ծրագրի քննարկման ընթացքում վարչապետ Նիկոլ Փաշինյանը փրփրեց այն բանի համար, որ Էդմոն Մարուքյանը փորձել էր նրան համեմատել նախորդների՝ Սերժ Սարգսյանի ու Ռոբերտ Քոչարյանի հետ: Փաշինյանը հոխորտաց, որ այսուհետ իրեն չհամեմատել նրանց հետո: Իհարկե, նա միանգամայն իրավացի է եւ համեմատությունը մեղմ ասած անբարոյականություն է: Քանզի եթե Սերժ Սարգսյանն ու իր թիմը տարիներ հետո էր, որ յուրայիններով, բարեկամներով ու հարազատներով տեղավորվել էին պետական ապարատում ու ապրում էին գոհ ու երջանիկ, ապա Փաշինյանը դա անում է առաջին իսկ օրվանից: Այսօր հաստատվեց, որ բարձր պաշտոններում ոչ միայն իր մտերիմ-բարեկամներն են, այլեւ տիկնոջ՝ Աննա Հակոբյանի: ՊԵԿ նախագահի տեղակալ Ռաֆիկ Մաշադյանի և Աննա Հակոբյանի միջև էլ ինչպես մամուլն էր գրել՝ բարեկամական կապ կա: «Ռաֆիկ Մաշադյանը խորթ մորաքրոջս թոռն է» իր մամուլի խոսնակի միջոցով փոխանցել է վարչապետի տիկինը, իսկ թե ինչ է ասել հետո, այլեւս կարեւոր չէ: Այդուհանդերձ, Հակոբյանը փորձել է փրկել իրավիճակը՝ ասելով, որ Մաշադյանին վերջին անգամ տեսել է 2010 թվականին հարազատի հուղարկավորության ժամանակ: <<Ամուսինս՝ ՀՀ վարչապետ Նիկոլ Փաշինյանը, մինչեւ վարչապետ դառնալը, երբեւէ Ռաֆիկ Մաշադյանին հանդիպելու առիթ չի ունեցել, Մաշադյանին ՊԵԿ նախագահի տեղակալի պաշտոնում նշանակելու պահին գաղափար անգամ չի ունեցել նման կապի գոյության մասին>>: Մաշադյանը ՊԵԿ հնաբնակներից է, այս համակարգում է դեռ 1996 թվականից, զբաղեցրել է տարբեր պաշտոններ։ 2013-2017 թթ․ ղեկավարում էր ՊԵԿ խոշոր հարկ վճարողների տեսչությունը։ Ապա ՊԵԿ փոքր հարկ վճարողների հարկային տեսչություն-վարչության պետն էր, նա Գագիկ Խաչատրյանի ամենամտերիմներից է ու նրանց ունեցվածքի մասին լեգենդներ են պատմում։ Հեղափոխությունից հետո Մաշադյանը ՊԵԿ փոխնախագահ նշանակվեց սուպերմարկետների հետ կապված աղմկոտ բացահայտումից հետո, երբ նա եւս վկայի կարգավիճակով կանչվեց ԱԱԾ՝ հարցաքննության: Դրանից հետո համակարգից պատմում են, որ Մաշադյանը այնտեղ է տեղավորել իր ծանոթ-բարեկամներին:Ավելին , պատմում են, որ ՊԵԿ իրական նախագահը հենց նա է, իսկ Դավիթ Անանյանը պարզապես <<հարս եկածի>> կարգավիճակում է: Հենց Մաշադյանն է զբաղվում կադրային քաղաքականությամբ եւ առհասարակ որոշում, թե ով ինչ պետք է անի: Պատահական չէ, որ վերջին աղմկահարույց պարգեւավճարների քննարկման ժամանակ էլ պարզ դարձավ, որ հենց ամենաշատը ինքն է պարգեւատրվել՝ մոտ 10 միլիոն դրամով: Նշենք, որ օրերս էլ նրա 23-ամյա որդին նշանակվեց Երեւանի կայազորի զինվորական դատախազ։ Ավելի վաղ երիտասարդը զբաղեցնում էր Լոռու կայազորի զինվորական դատախազի պաշտոնը։ Ուշագրավ է, որ ընդամենը 23 տարեկան Հարություն Մաշադյանն արդեն միլիոնատեր է՝ այն պարագայում, երբ նրա հայրը մշտապես եղել է պետական պաշտոնյա, իսկ ինքը դեռեւս 23 տարեկան է եւ եւս եղել է պետական աշխատանքի։ Պաշտոնը ստանձնելու պահին կրտսեր Մաշադյանը հայտարարագրել է 12 միլիոն դրամ, 130 հազար դոլար եւ Volkswagen touareg մակնիշի ավտոմեքենա։ Եւ, ահա, այսքանից հետո հայտարարել, թե բարեկամական կապը դեր չի խաղացել պաշտոնի առաջխաղացման հարցում, առնվազն ծիծաղելի է: Իսկ հետաքրքիր է ԱԱԾ դիմակավորներն այցելել են Մաշադյանի տուն, ինչպես որ արել են նախկին իշխանության առանցքային պաշտոնյաներից գրեթե բոլորի հետ: Կարող էին ասենք խտրականություն չդնելու համար դիմակավորների հետ տիկին Աննային ուղարկեին իր զարմիկի տուն, որպեսզի տանը եղած երեխաները չվախենային, բայց անաչառորեն հեղափոխական ԱԱԾ-ն կատարած կլիներ իր գործառույթը: Իրականում Փաշինյանը ՊԵԿ-ը դարձրել է իր եւ տիկնոջ ազգականներ հովանավորչությամբ գործող կառույց, եւ մաքսայինում մի կորպուսում ռուլիտ են անում իր բարեկամները, մյուսում՝ Աննա Հակոբյանի: