Իշխանության խորամանկ քայլը. Փաշինյանը խոստովանում է՝ որտեղ է «քցելու»

Վարչապետ Նիկոլ Փաշինյանն այսօր Ազգային ժողովում ներկայացրեց կառավարության առաջիկա հինգ տարիների ծրագիրը, որը հասցրել էր քննադատությունների մի ողջ բեռ հավաքել, քանի որ այն գրեթե զուրկ է քանակական միավորներից, ցուցանիշներից, կոնկրետությունից եւ ինչպես շատերն են որակել՝ ցանկությունների ժողովածու է հիշեցնում: Բայց պարզվում է Նիկոլ Փաշինյանի կառավարությունում ցուցանիշներ չեն գրել, քանի որ չեն ցանկացել ոտնահարել մեր քաղաքացիներիս իրավունքները, մասնավորապես լավ ապրելու ցանկության իրավունքը: Ըստ Փաշինյանի տրամաբանության՝ լավ ապրելու համար պետք է դառնալ տնտեսական ակտիվիստ, ինչպես ամիսներ առաջ ժողովուրդը իր գլխավորությամբ հեղափոխություն իրականացրեց, այնպես էլ հիմա պետք է ցանկանա տնտեսական ակտիվիստ դառնալով տնտեսական հեղափոխություն իրականացնի: Սա է Նիկոլ Փաշինյանի՝ լավ ապրելու բանաձեւը, որը նա կրկնում է քննարկման ընթացքում: «Մենք ասում ենք, որ Հայաստանում պետք է լինի զրոյից բիզնես ստեղծելու հնարավորությունը: Սրա համար նախ պետք է հարկային արտոնյալ պայմաններ ստեղծել. որպեսզի մարդը հարկերի տակ չճռա: Երկրորդ, պետք է մեծացնել ֆինանսական հոսքերի մատչելիությունը, որպեսզի մարդը հնարավորինս էժան տոկոսով վարկավորվելու հնարավորություն ունենա»,- ասաց վարչապետ Նիկոլ Փաշինյանը: Նա նշեց, որ կառավարությունը մի քանի առանցքային բարեփոխումներ է իրականացնելու, որոնց իմաստը լինելու է հետևյալը՝ քաջալերել մարդկանց աշխատանքը, մարդկանց տնտեսական ակտիվությունը և երկիրը գրավիչ դարձնել օտարերկրյա ներդրողների համար:«Ի վերջո ամենակարևոր նպատակներից մեկը, իհարկե, աղքատության հաղթահարումն է: Եվ ես ուզում եմ ասել, որ աղքատության հաղթահարման գործում շատ կարևոր ենք համարում Հարկային օրենսգրքի փոփոխության մեր ունեցած պատկերացումների մի հատվածը, որը պլանավորում է ՀՀ տնտեսական համակարգում նոր հասկացություն ներմուծել, որը պետք է անվանենք միկրոբիզնես, որը պետք է ազատված լինի բոլոր հարկերից: Խոսքը տարեկան մինչև 24 մլն դրամ շրջանառություն ունեցող բիզնեսների մասին է: Ընդհանրապես, մենք կարծում ենք, որ այս նորամուծությունը չափազանց կարևոր է աղքատության հաղթահարման տեսակետից»,- ասաց նա: Փաշինյանի համոզմամբ իրենք խնդիրն այն է, որպեսզի քաղաքացիներին օգնեն, քաջալերեն, որպեսզի նրանք կարողանան իրենք իրենց համար ստեղծել աշխատատեղեր և հաղթահարել աղքատությունը: Ըստ Փաշինյանի՝ աղքատությունը ոչ միայն սոցիալ-տնտեսական երևույթ է, աղքատությունը նաև հոգեբանական երևույթ է, աղքատությոունը նաև մտածողոության որոշակի տեսակի հետ կապ ունի: Ըստ նրա՝ մտածողության այս տեսակի մասին է ահազանգել Հրանտ Մաթևոսյանը իր «Ծառերը» ստեղծագործության մեջ: «Ես պատեհ եմ համարում այդ հատվածը ևս մեկ անգամ կրկնել՝ հույս ունենալով, ոոր Ազգային ժողովից ավելի հասանելի ու լսելի կլինի մեր քաղաքացիներին»,- ասաց նա: Այնուհետև ընթերցեց մի հատված. «Լավը չես, խեղճ ես, լավը չես, զավակս…»: Հատկանշական է, որ մինչ Փաշինյանը սրտաճմլիկ ելույթ էր ունենում ԱԺ ամբիոնից, նրա նախկին գործընկեր, Լուսավոր Հայաստան ֆրակցիայի ղեկավար Էդմոն Մարուքյանը իր էջում տեղադրեց Սեւակի «Անկեղծ ասած» բանաստեղծությունը, որտեղ խորհրդանշական տողը թերեւս հեքիաթներից հոգնելու մասին է: Նիկոլ Փաշինյանը այս պրիմիտիվ խորամանկությունը մի նպատակ ունի՝ իրավիճակի ողջ մեղքը բարդել քաղաքացիների վրա, ըստ այդմ նա ամեն պահի կարող է ասել, թող ՀՀ քաղաքացիները տնտեսական ակտիվիստներ դառնային, որ հեղափոխություն իրականացնեին: Իսկ թե ինչում է պետության դերն ու նշանակությունը, սա արդեն նրանց չի հետաքրքրում: Ավելին նա մեկ ուրիշ հարցից էլ ապահովագրեց իր կառավարությանը ձախողումից: Նա ասաց, որ հեղափոխությունից հետո կադրային ջարդ տեղի չի ունեցել, չեն ուզում լինել կառավարություն, որը բաժանարար գծեր է քաշել մարդկանց մեջ, կառավարությունը լցրել է իրենց մարդկանցով: «Եվ այսօր մենք գտնվում ենք 10 տոկոս նոր պաշտոնյաների և 90 տոկոս հին պաշտոնյաների փոխազդեցության միջավայրում, որտեղ կողմերից յուրաքանչյուրն ունի իր ազդեցությունը և փոորձում է ազդել մյուս կողմի պատկերացումների վրա: Երբեմն շատ դժվար է նախկին համակարգին դիմադրելը»:Սա նշանակում է, որ ինչ որ պահից Փաշինյանը իր կաբինետի գործունեության տապալումը կարող է բարդել նախկին համակարգի ներկայացուցիչների վրա: Սնի Սահակյան