Դրամատիկ վերջաբան,ում կամ ինչի համար է թատրոնը
Խորհրդարանում կառավարության ծրագրի եռօրյա քննարկումը դրամատիկ ավարտ ունեցավ: Նիկոլ Փաշինյանն ու իր թիմը մեղմ ասած ոհմակային հարձակում գործեցին Էդմոն Մարուքյանի եւ կուսակիցների վրա: Ու ոչ մի կերպ չհասկացվեց՝ ինչի համար, ինչ էին ասել լուսավորյալները, որ մնացել էր իշխանության կոկորդին: Եթե վերհիշենք եռօրյա քննարկումների ընթացքում ելույթներն ու հարցերը, ապա առանձնապես ջախջախիչ քննադատություն չէր եղել, ընդդիմադիրներն ավելի շատ նեղվել էին, որ իշխանականները առանց իրենց հետ քննարկման էին կազմել ծրագիրը: Եւ, ահա, այս կառուցողական քննարկման հանգուցալուծումը ավարտվեց փոխհրաձգությամբ՝ իշխանության ու ԼՀԿ-ի միջեւ: Բնականաբար, ամենահուժկու հարվածը Նիկոլ Փաշինյանինն էր, վարչապետի եզրափակիչ ելույթի հիմնական մասն ուղղված էր Էդմոն Մարուքյանին, ով Փաշինյանին Սերժ Սարգսյանի, Ռոբերտ Քոչարյանի ու Լևոն Տեր-Պետրոսյանի հետ միասն դրել էր նույն հարթության մեջ, որ ինչպես նախորդ ղեկավարներն են մեղավոր եղել աղքատության համար, այնպես էլ Փաշինյանն է լինելու, այլ հարց է, որ վերջինս այդ պատասխանատվությունն ուզում է իր վրայից գցել ու ասել, որ մարդկանց գլուխներում է աղքատությունը: «Եկել դառել են հեղափոխության հիմնական արբրիտրաժը՝ ով ա հավատում, ով չի հավատում, իրենք էլ հեղափոխության հավատաքննիչն են։ Մեկ էլ ասում են՝ հեղափոխություն չի եղել։ Հլը մի հատ դեմներդ ու կողքերդ նայեք, բա որ հեղափոխություն չի եղել, դուք 18 հոգով ի՞նչ գործ ունեք էստեղ նստած»։ Փաշինյանն այնքան իջեցրեց ընդդիմության հետ բանավեճը, որ հասավ մասնավոր տարածք ու քննադատեց Փաշինյանի կուսակից Արման Բբաբաջանյանին ու վերջինի լրատվամիջոցին ուղղված ակնարկներ արեց.«Խոսում եք Հայաստանի արտաքին քաղաքականոթյան, անկախ քաղաքականության, Հայաստանի ինքնության ու բանի մասին, ու ձեր հիմնարկի դեմը տնկում եք Հայաստանի, Միացյալ Նահանգների, Եվրամիության դրոշը, մեզ էլ խորհուրդ եք տալիս, որ պետք ա արտաքին քաղաքականությունը հավասարակշռել։ Բա Ռուսաստանի դրո՞շը խի չեք կախել հավասարակշռելու համար, էլ չեմ ասում՝ Վատիկանի»,-ասաց Նիկոլ Փաշինյանը՝ ակնարկելով Վատիկանում ՀՀ դեսպան Միքայել Մինասյանին։ Վարչապետի ելույթն ընդհատվում էր թիմակիցների ծափողջուններով, որոնք էլ մինչ այդ էին իրենց հերթին գրոհել ԼՀԿ-ի ուղղությամբ: Եւ այս փոխադարձ մեղադրանքների ընթացքում ակամայից հարց էր առաջանում՝ ինչու էին իշխանականները արհամարհում ԲՀԿ-ին, ի վերջո, միայն Գեւորգ Պետրոսյանի ելույթը բավական էր մի հատ էլ այդ կուսակցությանն ասֆալտին փռել: Նա նույնիսկ անձնական տարածք էր մտել ու անկեղծ հարցադրում արել՝ ձեր քույր-եղբայրներին էլ եք խորհուրդ տալիս գլխում հաղթահարել աղքատությունը: Եւ քանի որ չկար քննադատություն, տպավորություն էր ստեղծվում, որ իշխանությունը ԼՀԿ-ից ընդդիմություն էր կերտում, հատկապես, որ վերջին օրերին աննախադեպ հարաբերություններ են հաստատվել Ծառուկյանի ու Ռուսաստանի նախագահի միջեւ եւ անձնական հրավերով ԲՀԿ ղեկավարը Մոսկվայում էր: Սրան զուգահեռ տեղեկություններ կան, որ Ռուսաստանը փորձում է խաղադրույք կատարել ԲՀԿ-ի վրա, քանի որ արդեն բացահայտվել է, որ հեղափոխությունն իրականություն է դարձել Սորոսի փողերով: Անի Սահակյան
Հետևեք մեզ Viber-ում
