Նախարարն ընդդեմ Հայ Առաքելական Եկեղեցու

Երբ նախարարի պաշտոնում հայտնված անձնավորությունը իրեն թույլ է տալիս Հայ Առաքելական Եկեղեցու քահանային կոպտորեն դուրս հրավիրել դպրոցից, ապա նա հաջորդ րոպեին պետք է պաշտոնանկ արվի: Մինչ օրս ԿԳ նախարար Արայիկ Հարությունյանը պաշտոնանկ չի արվել:Սպասում ենք Արարատի մարզի դպրոցներից մեկում արձանագրված սկանդալի վերաբերյալ վարչապետի գնահատականին, սպասում են Կաթողիկոսի արձագանքին: Արայիկ Հարությունյանն անցել է մի սահման, որը որեւէ մեկին իրավունք չի տրված անցնել: Ոչ մոնղոլ, ոչ պարսիկ, ոչ արաբ, ոչ ռուս, ոչ օսմանցի նվաճողները հայ քահանային չեն արգելել մուտք գործել դպրոց, իսկ հայ նախարարն անկախ Հայաստանում նման քայլի է դիմում: Եթե մեր հասարակությունը դեռ առողջ է, դեռ կենսունակ է, ապա միանշանակ է, որ Արայիկ Հարությունյանը պետք է ներողություն խնդրի եւ պաշտոնանկ արվի, իսկ եթե դա տեղի չունենա, ապա նշանակում է, որ մենք շատ լուրջ խնդիր ունենք: Հայ Առաքելական Եկեղեցին ոչ միայն հավատի տուն է, այլ իր մեջ է ամփոփում մեր մոտ հինգ հազարամյա պատմության հոգեւոր եւ մշակութային արժեքները: Հայ Առաքելական Եկեղեցին դարեր շարունակ պահպանել է մեր լեզուն եւ գիրն ու գրականությունը: Վերջապես, ինչպես գրել է Տեր Ղազար քահանա Պետրոսյանը՝ 1. Հայոց դպրոցի եւ դպրության հիմնադիրը Հայոց Քահանան է 2. Հայոց դպրոցների եւ՛ ուսուցիչներ, եւ՛ շատ դեպքերում կազմակերպիչները եղել են քահանաները՝ ցայժմ սփյուռքում տեսնում ենք: 3. Հայոց ամենանշանավոր եւ ամենատաղանդավոր բանաստեղծը՝ Ս.Գրիգոր Նարեկացին քահանա էր: 4. Հայոց պատմահայրը՝ Ս.Մովսես Խորենացին քահանա էր: 5. Հայոց հին եւ ամենանշանավոր Ասղագետը՝ Անանիա Շիրակացին քահանա էր: 6. Հայոց իրավաբանության թագակիրը՝ Մխիթար Գոշը քահանա էր: 7. Հայոց առաջին տպագիր գրքի հեղինակը՝ Հակոբ Մեղապարտը քահանա էր: 8. Հայոց դպրությունը աշխարհին ներկայացնող Մխիթարյան հայրերը ՝ բոլորը քահանաներ էին: Հիմա անցնենք հարցի իրավական կողմին, որին անդրադարձել է ԱԺ պատգամավոր, «Լույս» դաշինքի ներկայացուցիչ Անի Սամսոնյանը:  Կա օրենք՝ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԵՎ ՀԱՅԱՍՏԱՆՅԱՅՑ ԱՌԱՔԵԼԱԿԱՆ ՍՈՒՐԲ ԵԿԵՂԵՑՈՒ ՀԱՐԱԲԵՐՈՒԹՅՈՒՆՆԵՐԻ ՄԱՍԻՆ (Ընդունված է 2007 թվականի փետրվարի 22-ին), և կա այդ օրենքի հոդված 8-ը, որն ասում է․ 1. Հայաստանյայց Առաքելական Սուրբ Եկեղեցին իրավունք ունի` 1) հիմնելու կամ հովանավորելու նախադպրոցական հաստատություններ, տարրական, միջնակարգ և ավագ դպրոցներ, միջնակարգ մասնագիտական և բարձրագույն ուսումնական հաստատություններ՝ Հայաստանի Հանրապետության օրենսդրության շրջանակներում. 2) մասնակցելու պետական կրթական հաստատություններում «Հայ Եկեղեցու պատմություն» առարկայի ուսումնական ծրագրի և դասագրքի մշակմանը, այն դասավանդող ուսուցիչների որակավորման պահանջների սահմանմանը և դպրոցներին ներկայացնելու այդ ուսուցիչների թեկնածությունները. 3) պետական կրթական հաստատություններում կամավոր ուսումնական դասընթացներ կազմակերպելու՝ օգտագործելով դրանց շենքերն ու ռեսուրսները՝ այդ հաստատությունների հետ համաձայնեցնելով դասընթացների իրականացմանն առնչվող խնդիրները. 4) նպաստելու հասարակության հոգևոր կրթությանը կրթական հաստատություններում՝ օրենքով սահմանված կարգով: Սա ի գիտություն։ Ինչ վերաբերում է պետությանը, հասարակությանը, բանակին կամ եկեղեցուն առնչվող հարցերին․ կարելի է հեռացնել չորացած ու հին ծաղիկները, բայց պետք չի ջարդել ծաղկամանը։ Հ․Գ Ի դեպ ես հստակ կողմնորոշված լիբերալ քաղաքական ուժի ներկայացուցիչ եմ։ Այսքանից հետո սպասում ենք արդեն կառավարության ղեկավարի արձագանքին եւ կոնկրետ քայլերին, իսկ Արայիկ Հարությունյանը պետք է ներողություն խնդրի եւ չսպասի պաշտոնանկությանը, այլ հեռանա ինքնակամ: Նա վաղուց արդեն ապացուցել է, որ Նիկոլ Փաշինյանի ամենաանհաջող կադրն է:   Top-News.am