Անկախ մեր քվեարկությունից, մնալու ենք ձեր համախոհը. Ն. Զոհրաբյանը՝ Փաշինյանին
ԲՀԿ-ական պատգամավոր Նաիրա Զոհրաբյանն իր ելույթում հայտարարեց, որ անկախ ամեն բանից իրենք մնալու են իշխանության կողքին և աջակցելու տնտեսական հեղափոխության հարցում: «Այս երեք օրերի քննարկումների ընթացքում ես և իմ գործընկերները ներկայացրեցինք, թե ինչպես ենք տեսնում հանրային բարձր լեգիտիմություն ունեցող իշխանության ներկայացրած տնտեսական հեղափոխության ծրագիրը, այն պետք է լիներ հեղափոխական: Մեծամասնության պատգամավորների ելույթներում ամեն երրորդ բառը Փաշինյանի իշխանության բարձր լեգիտիմություն բառն էր, ես ինձ թույլ տամ մի քիչ խմբագրել և ասել՝ Փաշինյանի անձի բարձր լեգիտիմությունը, և այդ լեգիտիմությունը հաշվի առնելով է, որ ասում ենք՝ այն ինչ ներկայացրել եք որպես կառավարության ծրագիր, վախվորած է ու զգուշավոր: Այնքան զգուշավոր, որ եթե 5 հազար անգամ կրկնենք՝ ունենք բարձր լեգիտիմություն, դա չի լուծելու տնտեսական սոցիալական խնդիրների այն բեռը, որը լուծելու համար ժողովուրդը ձեզ տվեց այդքան բարձ քվե: Սակայն անգամ դուք, պարո՛ն վարչապետ, վստահության այդքան բարձր ռեսուրսով չեք կարողանալու տևական ժամանակ ձեր ուսերին տանել չլուծված խնդիրների այն բեռը, որի լուծմանը ՀՀ հպարտ քաղաքացին սպասում է արդեն մի քանի ամիս, այդ համբերությունը վստահեցնում եմ, հավերժ չի լինելու»,- ասաց Զոհրաբյանը: Այնուհետև հավելեց. «Ես վախենում եմ, որ հանրությունը կամաց-կամաց կսկսի կորցնել հավատն իր ապագայի հանդեպ, որին հավատացել է ապրիլ-մայիս ամիսներին: Մենք ձեր համախոհներն ենք, ԲՀԿ-ի նպատակը տնտեսական հեղափոխությանը նպաստելն է, դրա համար կոնկրետ առաջարկներ ենք ներկայացրել: Բնականաբար, այդ առաջարկների արձագանքից կախված կլինի ԲՀԿ քվեարկությունը: Եթե մեր առաջարկները մնան անարձագանք, դեմ ենք քվեարկելու կառավարության ծրագրին: Անկախ մեր քվեարկությունից, պարոն վարչապետ, մնալու ենք ձեր համախոհը, անելու ենք առավելագույնը, որ քաղաքական հեղափոխության արժեքները կապիտալիզվացվեն տնտեսական հեղափոխության»,-եզրափակեց նա:
Հետևեք մեզ Viber-ում
