Դրանից բոլորս ենք շահելու. Լիլիթ Մակունց

ԱԺ «Իմ քայլը» խմբակցության ղեկավար Լիլիթ Մակունցը  դաշինքի անցկացրած փակ նիստից հետո լրագրողների հետ ճեպազրույցի ժամանակ ասաց, որ կարող է կարծիք հայտնել որպես խմբակցության ղեկավար եւ որպես առանձին պատգամավոր: Դիտարկմանը, թե «Իմ քայլը» խմբակցության համար կառավարության ծրագիրն այդքան կատարյա՞լ է, որ որեւէ կերպ ընդդիմության առաջարկները չեն փորձում կառուցողական դաշտում քննարկել, այլ անմիջապես որեւէ պատգամավոր իր պարտքն է համարում ընդդիմության քննադատությունից հետո պաշտպանել վարչապետին կամ կառավարության անդամներին, Մակունցն արձագանքեց. «Նման բան, իհարկե, չկա եւ նման մոտեցում չկա: Վարչապետը հայտարարեց, որ պատրաստ են քննարկել բոլոր խմբակցությունների առաջարկները: Խորհրդարանում տեղի են ունենում բնականոն քննարկումներ, որտեղ մի պատգամավոր կամ մի խմբակցություն ներկայացնում է տեսակետ եւ դրան ստանում է արձագանք: Դա կարող է լինել թե՛ «Իմ քայլը» խմբակցությանը, թե՛ «Լուսավոր Հայաստան» եւ «Բարգավաճ Հայաստան» խմբակցությունները: Մենք բաց ենք թե; քննարկումների, թե; համատեղ աշխատանքների առումով: Իհարկե, յուրաքանչյուրս հասկանում ենք, որ մյուս խմբակցությունները ունեն իրենց սահմանած մոտեցումները, մենք ունենք մերը: Այն հատվածներում, որտեղ մենք կկարողանանք համագործակցել, շատ ուրախ կլինենք եւ վստահ ենք, որ դրանից բոլորս ենք շահելու: Չգիտեմ՝ ինչու է ձեզ մոտ այդ տպավորությունը: Միգուցե նաեւ պայմանավորված նրանով, որ ընդդիմության ներկայացուցիչները, նաեւ Էդմոն Մարուքյանը նշեց այդ մասին: Չկա անհանդուրժողականության մթնոլորտ»,- ասաց «Իմ քայլը» խմբակցության ղեկավարը: