Փաշինյանը հասկացավ ամենագլխավորը

Անցած մի քանի օրերը կարևոր էր ուղերձների առումով՝ Հայաստան-ԵՄ փոխհարաբերությունների համատեքստում: Հնչեցին ուղենիշային հայտարարություններ: Գերմանիայի կանցլեր Անգելա Մերկելի հետ ավելի քան մեկ ժամ տևած բանակցություններից հետո ՀՀ վարչապետ Նիկոլ Փաշինյանը հայտարարեց, որ պաշտոնական Երևանն ակնկալում է առաջիկայում բանակցություններ սկսել Եվրամիության հետ վիզաների ազատականացման շուրջ: Իր հերթին Մերկելը, պատասխանելով «Ազատության» հարցին, թե արդյոք, հաշվի առնելով ԵՄ-ի՝ «Ավելին ավելիի դիմաց» բանաձևը և Հայաստանում տեղի ունեցած փոփոխությունները, Բեռլինը մտադիր չէ ջանքեր գործադրել վիզաների ազատականացման ուղղությամբ և ընդհանրապես աջակցել, որ Եվրամիության կողմից Հայաստանին տրվելիք օժանդակությունը մեծանա, ասաց, որ այդ օժանդակությունը արդեն իսկ հայտնի է, որ շուտով կմեծանա, և այս տարի Հայաստանը ԵՄ-ից ավելի մեծ գումար կստանա։ «Այո, այդպես է, մենք արդեն աջակցում ենք։ Եվրամիությունը պարոն Հանի միջոցով իր աջակցությունը հստակ արդեն արտահայտել է, և մենք չենք ցանկանում արգործնախարարության արտաքին քաղաքականությանը միջամտել։ Հայաստանը իբրև անկախ պետություն ինքն է որոշում, թե արտաքին հարաբերություններում որ երկրի հետ է աշխատում։ Մենք ունենք արդեն պայմանագիր, որով կարող ենք զարգացնել մեր հարաբերությունները», - նշել էր Մերկելը։ Այսպիսով, Փաշինյանը գերմանական ամբիոնն օգտագործեց՝ փաստելու, որ Ընդլայնման և հարևանության հարցերով Եվրամիության հանձնակատար Յոհաննես Հանի վերջին այցը հստակ պատասխան տվեց այդ հարցին. «ԵՄ ներկայացուցիչները արդեն ասել են, որ պատրաստվում են ընդլայնել Հայաստանին տրամադրվող օժանդակության ծավալները։ Այս առումով, կարծում եմ, ակնհայտ է, որ ՀՀ-ԵՄ հարաբերություններում և ԵՄ երկրների հետ հարաբերություններում շատ լավ գործընկերային մթնոլորտ է հաստատված։ Ես չեմ կարծում, թե այդ առումով մենք խոչընդոտներ կունենանք։ Ըստ էության, Հայաստանում իսկապես ժողովրդավարական էական զարգացումներ են տեղի ունենում, և որևէ կասկած չկա, որ այս զարգացումները կշարունակվեն՝ անկախ արտաքին աջակցության առկայությունից կամ բացակայությունից, որովհետև ժողովրդավարությունը, և նաև վերջին ընտրություններում դա արձանագրվեց, մեր ժողովրդի ընտրությունն է, մեր ժողովրդի արժեքային համակարգը»։ Հատկանշական էր նուրբ դիտարկումը, որ «որևէ կողմից մեր առաջ չի դրվում ժողովրդավարության համատեքստում աշխարհաքաղաքական որևէ ընտրություն կատարելու խնդիր»: Այստեղ, Փաշինյանը նպատակ ուներ շեշտելու, որ բաց հարաբերություններ է պահում թե՛ Ռուսաստանի, թե՛ արևմուտքի գործընկերների հետ։ Հաջորդ կարևոր հանգամանքն այն էր, որ Փաշինյանն էլ արձանագրեց, որ Հայաստանը պետք է կարողանա առավել արդյունավետ իրականացնել բարեփոխումների օրակարգը՝ վստահ լինելով, որ աջակցություն կունենանք ինչպես Եվրամիության մեր գործընկերներից, այնպես էլ Եվրասիական տնտեսական միության մեր գործընկերներից: Հայաստանի զարգացումն, այսպիսով, Փաշինյանն առայժմ կապում է դրսի աջակցության հետ: Հիշեցնենք, որ Փաշինյանի երկօրյա պաշտոնական այցը Գերմանիա ավարտվել էր Գերմանիայի տնտեսական համայնքի ներկայացուցիչների հետ հանդիպմամբ։ Գերմանիայի տնտեսության Արևելյան հանձնաժողով-Արևելյան Եվրոպա միության գործադիր տնօրեն Միխաել Հարմսը, ՀՀ կառավարության պաշտոնական կայքի փոխանցմամբ, ասել էր. «Հայաստանի հետ կապված մեր օրակարգը շատ հավակնոտ է. ապրիլին մենք մեծ տնտեսական պատվիրակությամբ գալու ենք Հայաստան: Ստորագրեցինք Մտադրությունների մասին հուշագիր, որը հենց վերաբերում է Հայաստանի առաջնահերթություններից մեկին` տեղեկատվական տեխնոլոգիաների ոլորտին: Հայաստանը նաև շատ հետաքրքիր օրինակ է տնտեսական առումով` որպես երկիր, որը միաժամանակ ինտեգրվում է և՛ Եվրոպական միությանը, և՛ Եվրասիական տնտեսական միությանը: Դա բարձրացնում է Հայաստանի ներդրումային գրավչությունը»: Նա տեղեկացրել էր, որ պատվիրակության կազմով գալու են Հայաստան։ Փաշինյանի գլխավոր ուղերձը գործընկերներին պարզ է`Հայաստանում քաղաքական փոփոխությունները տնտեսական փոփոխությունների հնարավորություններ են ստեղծել, հետևաբար՝ «օգնեք մեզ»: Փաշինյանը հասկացել է, որ ներսում երկրի զարգացում ապահովելը բարդ գործ է, իսկ տնտեսական հեղափոխություն իրականացնելու համար չկան ներդրումներ, եթե զարգացում ապահովի՝ դրա համար երկար ժամանակ է պետք: Ահա, այստեղ էր, որ Գերմանիան կարող էր արագացնել ՀՀ-ԵՄ փոխհարաբերությունների կտրվածքով կարևոր որոշումների կայացում՝ Հայաստանի աջակցության հարցում: Թամար Բագրատունի