Արցախում խաղաքարտեր են բացվում.արջի ծառայություն մատուցողները

Արցախի հերոս, պաշտպանության նախկին նախարար Սամվել Բաբայանը քաղաքական հայտը առաջիկա 2020 թվականի նախագահի ընտրություններին, Արցախում իրարանցում է առաջացրել: Խնդիրը ոչ այնքան Բաբայանի անձն է եւ այն, որ ընտրություններին նրա մասնակցությունից շատերը սարսափահար են եղել, այլ նրա հայտարարությունն այն մասին, որ Արցախի քաղաքական ու ռազմական էլիտան 2016-ին Սերժ Սարգսյանի հետ քննարկել է <<հող հանձնելու >> ծրագիր: «Էն որ հիմա բլբլում են, էն ժամանակ բլբլայիք,որ եկել էր ձեզ հետ խոսելու եւ ասել էր՝ ինչ է լինելու: Այն ժամանակ, որ խոսեիք մենք կհասկանայինք, որ դուք ինչ-որ մի հարց եք լուծում: Բոլորն այդ դահլիճում են եղել: Օրինակ, թող Ռազմիկ Պետրոսյանը կամ Արմո Ծատրյանը ասեն, թե ինչի մասին են խոսել», հայտարարել էր Բաբայանը: Նրա այս հայտարարությանն Արցախից արձագանքել են շատերը՝ ԱԺ խոսնակ Աշոտ Ղուլյանը, ԱԱԽ քարտուղար Վիտալի Բալասանյանը, նախկին վարչապետ Արայիկ Հարությունյանը, այսինքն նրանք, ովքեր հավակնում են մասնակցել Արցախում սպասվելիք նախագահական ընտրություններին: Ուշագրավ է, որ բոլորը միաբերան հերքել են Սամվել Բաբայանի հայտարարությունը, հայտնելով ճիշտ հակառակի մասին, որ այդ հանդիպումից հետո Արցախի ղեկավարության տոնայնությունն ավելի է կոշտացել Ադրբեջանի նկատմամբ: Մինչդեռ Արցախի Հանրապետության նախկին փոխվարչապետ Արթուր Աղաբեկյանը ավելի հեռուն է գնացել եւ իր ֆեյսբուքյան էջում անդրադարձել է Արցախի հաջորդ նախագահի հարցին նշելով, որ Արցախի «Ազատ հայրենիք» կուսակցության նախագահ Արայիկ Հարությունյանը չունի այլընտրանք: «Ամեն անգամ լինելով Ստեփանակերտ քաղաքում, աջից-ձախից անընդհատ հարցնում են ինձ, վերջը ո՞վ է լինելու Արցախի հաջորդ նախագահը: Հրապարակային պատասխանում եմ բոլորին. 2012թ. լինելով Արցախի փոխվարչապետը և աշխատելով վարչապետ Արայիկ Հարությունյանի հետ, իմանալով նրա պատկերացումները և տեսլականը Արցախի ապագայի, նրա զարգացման մասին, գտնում եմ, որ երկրի հաջորդ նախագահը պետք է լինի Արայիկ Հարությունյանը, և հիմա հայտարարում եմ՝ Արայիկ Հարությունյանը չունի այլընտրանք»,- գրել է Աղաբեկյան: Դժվար է կշռելը՝ Արթուր Աղաբեկյանը իր քայլով ավելի շատ օգնել, թե վնասել է Արայիկ Հարությունյանին, Աղաբեկյանը ամենաշատ քննարկված պաշտոնյաներից է՝ վատ իմաստով, եւ լրատվամիջոցները հաճախ են անդրադարձել Աղաբեկյանի բիզնես գործունեության եւ մութ գործարքների մասին խոսվում է տասնամյակներ շարունակ, դեռ չի մարել Մարտիկ հիմնադրամի շուրջ բարձրացած աղմուկը, եւ ահա, Արթուր Աղաբեկյանը հանկարծ ստանձնում է Արայիկ Հարությունյանի անձնական աշուղի դերը: Եթե Արայիկ Հարությունյանն անձամբ չի մտահաղացել այս անհաջող փիառ ակցիան, ուրեմն պետք է անհապաղ քայլեր ձեռնարկի՝ իրեն ազատելու արջի ծառայություններից: Արցախում հակառակ Աղաբեկյանի պնդումների այլընտրանք որքան ուզեք կա, այսօրվա քաղաքական ղեկավարության յուրաքանչյուր դերակատար դրա վառ օրինակն է, որն անցել է պատերազմի դաշտով եւ ուղնուծուծով զգում է ղարաբաղյան հարցի էությունը: Եւ առհասարակ՝ ով է Աղաբեկյանին իրավունք տվել խոսելու մի ողջ ժողովրդի անունից ու ընտրություններից առաջ հայտարարել, որ Հարությունյանն այլընտրանք չունի: Անի Սահակյան