«Դա աբսուրդ է». Հայկ Գրիգորյան
«Ազգային առաջընթաց» կուսակցության լրատվության ղեկավար Հայկ Գրիգորյանը ֆեյսբուքյան իր էջում գրել է. «Դեռևս նախընտրական քարոզարշավի ընթացքում «Ազգային Առաջընթաց» կուսակցությունը բազմիցս բարձրացրել է քարոզարշավի վրա ծախսվող աստղաբաշխական գումարների, դրանց չափերի անթույլատրելիության, կասկածելի ծագման և թույլատրվող գումարի վերին շեմի իջեցման հարցը: Գործող ընտրական օրենսգրքով կուսակցություններին թույլատրվում է քարոզարշավի վրա ծախսել մինչև 500 միլիոն դրամ, այսինքն` 1 միլիոն դոլարից ավել: Դա աբսուրդ է: Պարզ է, որ ի սկզբանե անհավասար պայմաններ են ստեղծվում, և առաջնությունը տրվում է օլիգարխիկ կամ հովանավոր ունեցող կուսակցություններին: ԿԸՀ նախաձեռնությամբ այսօր անց է կացվել սեմինար-քննարկում նախընտրական քարոզարշավի և ընտրությունների կազմակերպման շուրջ։ «Ազգային Առաջընթաց» կուսակցությունը քննարկման ժամանակ բարձրացրել է հենց այդ հարցը. նախընտրական շրջանում հանրությանն ամենաշատը հուզող՝ ՀՀ սոցիալական վիճակի համեմատ ծախսվող գումարների շատ մեծ չափերի և թույլատրելի վերին սահմանի իջեցման հարցը, ինչպես նաև հաշվետվությունից դուրս մնացող ծախսերն օրենսդրական կարգավորումներով շտկելու հարցը։ Հուսանք՝ շուտով կտեսնենք փոփոխությունների փաթեթը»։
Հետևեք մեզ Viber-ում
