Վանեցյանի նոր կադրը՝ փորձություն համակարգի համար

Այսօր հայտնի դարձավ, որ ԱԱԾ-ում տարեսկզբին աղմկահարույց նշանակում է տեղի ունեցել: «Հրապարակ» օրաթերթը գրեց, որ ԱԱԾ հակահետախուզության դեպարտամենտի իրավապահ համակարգի սպասարկման և վերահսկման բաժնի ղեկավար է նշանակվել Սերոբ Հարությունյանը: Իրականում այս նշանակումը լի է վտանգներով, փառահեղ կարիերայով հայտնի Սերոբ Հարությունյանը ավելի շուտ դառնալու է փորձություն մեր ազգային անվտանգության համար, քան կարողանալու է ի պաշտոնե ծառայություն մատուցել անվտանգության ոլորտում: Մամուլում բազում նյութեր կան, որոնք պատմում են Հարությունյանի անցած փառահեղ ուղու մասն: Այսպիսով, նա ինչպես թերթն էր գրել հայտնի է կրիմինալի հետ իր կապերով: Եթե ամփոփ բնութագրեն այս նորանշանակ պաշտոնյային, ապա նախկին իշխանության և հայտնի սպասավորն է: Դեռևս 90-ականներին Սերոբ Հարությունյանը լինելով հասարակ, ծանր սոցիալական կարգավիճակով ապրող սպա, 2005-2006թթ ՀՀ Ոստիկանությունից Հրաչյա Հարությունյանի (կրակեմ Հրաչ) հովանավորությամբ ԱԱԾ-ում աշխատանքի է անցել որպես օպերլիազոր. Հրաչյա Հարությունյանը ԱԱԾ առաջին տեղակալն էր: Հետագայում նույն կրակեմ Հրաչի շնորհիվ Սերոբ Հարությունյանը ԱԱԾ–ի կողմից նշանակվել է ՀՀ ԱՆ «Նուբարաշեն» քրեակատարողական հիմնարկի պետի տեղակալ օպերատիվ գծով: Նախկիում սոցիալական ծանր կացությամբ ապրող Սերոբ Հարությունյանը այդ պաշտոնում հանկարծ էլիտար շքեղ բնակարան է ձեռք բերում հյուսիսային պողոտայում մոտ 200 քմ ընդհանուր մակերեսով։ Նա ըստ մամուլի՝ բացի հյուսիսային պողոտայի շքեղ բնակարանից ունի նաև հարյուր հազարավոր դոլարների հասնող շքեղ ավտոմեքենաների պարկ, մի քանի առևտրային տարածքներ, գազալցակայան։ 2010թ, երբ ՀՀ ԱԱԾ առաջին տեղակալ Հրաչյա Հարությունյանը ազատվեց զբաղեցրած պաշտոնից, Սերոբ Հարությունյանը նշանակվեց Զվարթնոց օդանավակայանի ոստիկանության պետ, նա հասցրել էր ԱԱԾ-ից տեղափոխվել ոստիկանական համակարգ: Առաջին իսկ գործը որպես Զվարթնոց օդանավակայանի ոստիկանության բաժնի պետ, իր, արդեն նախկին կոլեգաների նկատմամբ բանսարկությունն էր, որի հետևանքով ԱԱԾ որոշ աշխատակիցներ վերջինիս հակասական գործողությունների արդյունքում անարդարացի արձակվեցին ծառայությունից: Հետագայում ինքը Հարությունյանը մի քանի աղմկոտ պատմություններից հետո հայտնվեց կադրերի ռեզերվում, սակայն բարձր հովանավորյալների շնորհիվ մի քանի տարի առաջ նշանակվեց Կոտայքի մարզային վարչության պետի  պաշտոնում, որտեղից ըստ մամուլի տեղեկությունների՝ նրան հեռացրեցին օրենքով գողերի հետ կենացներ խմելու և այդկերպ ոստիկանական համակարգը արատավորելու համար, որը բացահայտ իր մեկնաբանություններում այդ ժամանակ արեց նաև այդ ժամանակվա ոստիկանապետ Վլադիմիր Գասպարյանը: Ս.Հարությունյանը երկար անգործ չմնաց և իր ունեցած լայն կապերի ու միջոցների շնորհիվ նշանակվեց ՀՀ ԱՆ <<Նուբարաշեն>> քրեակատարողական հիմնարկի ղեկավար: Այդ ժամանակ Սերոբ Հարությունյանին հովանավորում էին ՀՀ վերաքննիչ քրեական պալատի նախագահ Վազգեն Ռշտունին, ՀՀ ԱԱԾ Տնօրեն Գեորգի Կուտոյանը, Վ.Գասպարյանի թիկնազորի պետ Արշակ Կարապետյանը, Սերժ Սարգսյանի եղբայր Սաշիկ Սարգսյանը և իհարկե անմասն չէր կարող մնալ քրեական աշխարհը, որի համար նա իդեալական թեկնածու էր որպես երկրի հեղինակավոր բանտի բանտապետ: Ազատվեց հեղափոխությունից հետո: Եվ այսօր նման «փառահեղ» ուղի անցած նախկին ռեժիմի սպասավորը  Ազգային Անվտանգության ծառայությունում, նշանակվում է իրավապահ համակարգի սպասարկման և վերահսկման բաժնի ղեկավար։ Նշանակվում է այն ժամանակ, երբ ՀՀ-ն ցանկանում է իրականացնել անցումային արդարադատության ներդնում, իսկ ամենացավոտ և մտահոգող հանգամանքը կայանում է նրանում, որ նշանակվելով այդպիսի պատասխանատու պաշտոնին վերջինիս հասանելի է դառնում ԱԱԾ-ի նշված ոլորտի գործակալական ապարատը: Անի Սահակյան