Փաշինյանի պայմանը կանցնի՞. Կրկին նոր հանդիպում

Հայաստանի և Ադրբեջանի արտգործնախարարներն աշխատում են երկրների ղեկավարների հնարավոր հանդիպման նախապատրաստման շուրջ, Deutsche Welle-ի ռուսական ծառայությանը տված հարցազրույցում ասել է Հայաստանի Հանրապետության վարչապետ Նիկոլ Փաշինյանը: Լրագրողի հարցին, թե ինչ են տվել Ադրբեջանի նախագահ Իլհամ Ալիևի հետ հանդիպումները, Փաշինյանը պատասխանել է. «Սա միայն նախնական գործընթաց է, խոսակցություններ: Լեռնային Ղարաբաղի խնդրի շուրջ մեր պաշտոնական բանակցությունները դեռևս չեն սկսվել, մենք պարզապես հանդիպում ենք, զրուցում, կարծիքներ փոխանակում գործընթացների, բանակցային գործընթացի պատմության մասին: Մենք չենք ակնկալել, որ մեր այդ շփումների արդյունքում լինելու են որոշակի տեղաշարժեր»: Հայտնելով, որ այժմ Հայաստանի և Ադրբեջանի արտգործնախարարներն աշխատում են Փաշինյան-Ալիև հնարավոր հանդիպման նախապատրաստման շուրջ՝ վարչապետն ընդգծել է. «Նրանք աշխատում են այդ հնարավոր հանդիպումը կողմերի համար ավելի հասկանալի դարձնելու համար. ինչ և ինչպես ենք քննարկելու: Անհնար է հակամարտությունը կարգավորել՝ չլուծելով որոշակի հստակ հարցեր: Օրինակ, ես մեկ անգամ չէ՝ հայտարարել եմ, որ կարող եմ բանակցություններ վարել Հայաստանի Հանրապետության անունից, սակայն հակամարտությունն առնչվում է Լեռնային Ղարաբաղին: Այդ պարագայում ո՞վ է ներկայացնելու Լեռնային Ղարաբաղը, այն հակամարտության հիմնական կողմերից մեկն է»: Նա հիշեցրել է, որ Լեռնային Ղարաբաղում կան իշխանություններ, այդտեղ անցկացվում են ընտրություններ, ընդ որում, ԼՂ-ում բնակվող մարդիկ չեն մասնակցում Հայաստանի ընտրություններին: «Նրանք ինձ իրենց որևէ տեղ ներկայացնելու մանդատ չեն տվել: Լեռնային Ղարաբաղի բնակիչներն ունեն իրենց ներկայացուցիչները, ովքեր էլ պետք է բանակցային գործընթացում ներկայացնեն իրենց»,- ասել է վարչապետը: Փաշինյանը բացարձակապես անընդունելի է համարել զուգահեռներ տանելը ԼՂ հիմնախնդրի և այլ, օրինակ Դոնբասի կամ Աբխազիայի խնդիրների միջև: «Մեզ համար բացարձակ անընդունելի է, որ նման իրադրությունների միջև կարող են զուգահեռներ տարվել, քանի որ դրանք բացարձակ այլ ծագում ունեն, տարբեր իրավիճակներ են»,- ասել է ՀՀ վարչապետը: Փաշինյանն, այսպիսով, գնալով կոշտացնում, ամրացնում է հայկական կողմի դիրքորոշումը: Ըստ ամենայնի, հայկական կողմը ձգտում է հաջորդ հայ-ադրբեջանական հանդիպմանը հանդես գալ ավելի ամուր դիրքերից: Դա վկայում է այն մասին, որ պաշտոնական Երևանը հաշվի է նստում հասարակական անհանգստությունների հետ: Իսկ այդ անհանգստություններն արդեն մի քանի ամիս է, ինչ հնչում են հանրային քննություններում՝ Փաշինյան-Ալիև արդեն մի քանի հանդիպումներից հետո՝ ավելի ու ավելի ինտենսիվորեն: Ի դեպ, ԱԳՆ խոսնակ Աննա Նաղդալյանը երեկ տեղեկացրել է, որ նախարար Զոհրաբ Մնացականյանը կմասնակցի Մյունխենի անվտանգության համաժողովին, որը կայանալու է փետրվարի 16-18-ը: Համաժողովին իր մասնակցությունը հաստատել է նաև Ադրբեջանի արտաքին գործերի նախարարը, և Հայաստանի ԱԳՆ-ից չեն բացառում, որ կլինի հանդիպում ադրբեջանցի պաշտոնակից Էլմար Մամեդյարովի հետ: Արտգործնախարարների վերջին հանդիպումը հունվարի 16-ին Փարիզում տևել էր ավելի քան չորս ժամ: «Երբ որ լինում է երկուսի միջև հանդիպման անցկացման համաձայնություն, ապա մենք համակարգված ձևով մշտապես հայտարարում ենք դրա մասին», - հավելել է Նաղդալյանը՝ պարզաբանելով․ - «Համակարգված ձևը նշանակում է, որ դա արվում է նույն ժամին և նույն օրը»: ՀՀ ԱԳՆ նախարարության խոսնակը, երեկ մեկնաբանելով վարչապետ Նիկոլ Փաշինյանի հայտարարությունը, թե իր կառավարությունը ընդհանրապես չի կարող քննարկել «տարածքներ խաղաղության դիմաց» բանաձևը, վերահաստատեց, որ Արցախի կարգավիճակը և անվտանգության ապահովությունը գերակա առաջնահերթություն են Հայաստանի համար: «Հայաստանը բազմիցս է ներկայացրել կարգավորման գործընթացում իր մոտեցումները՝ բացարձակապես խաղաղ, բացարձակապես Մինսկի խմբի համանախագահների հովանու ներքո: Արցախի կարգավիճակը և անվտանգության ապահովությունը այս գործընթացում գերակա առաջնահերթություն են Հայաստանի համար: Բանակցությունների արդյունավետության բարձրացման համար էական նշանակություն ունի խաղաղության նպաստող մթնոլորտի ապահովումը՝ այդ թվում վստահության և անվտանգության մեխանիզմների ամրապնդման միջոցով, որը իր մեջ ներառում է նաև հակամարտության սրման ռիսկերի և ագրեսիվ հռետորաբանության բացառումը», նշել է Աննա Նաղդալյանը: Մետաքսյա Շալունց