Ում կողմից է «ցեց» գցվում Արցախում

Արցախի հերոս, պաշտպանության նախկին նախարար Սամվել Բաբայանը քաղաքական հայտ է ներկայացնում, նա ցանկանում է մասնակցել Ա8ցախի նախագահական ընտրություններին, որոնք տեղի են ունենալու 2020 թվականին:Այս համատեքստում Բաբայանը մի քանի ուշագրավ հայտարարություն է արել Ազատության հետ զրույցում : Հիշեցնենք՝ Բաբայանին Սերժ Սարգսյանի իշխանությունը 2017-ի նոյեմբերին դատապարտել էր 6 տարվա ազատազրկման: Դատարանը նախկին նախարարին մեղավոր էր ճանաչել, որ նա դրդել է մի խումբ անձանց ձեռք բերել, փոխադրել և պահել ապօրինի ռազմամթերք՝ «Իգլա» զենիթահրթիռային համալիրը, ինչպես նաև փոխարկման արդյունքում ձեռք է բերել հանցավոր ճանապարհով ստացված եվրո թղթադրամներ: Թավշյա հեղափոխությունից հետո Սամվել Բաբայանը պատգամավորական երաշխավորությամբ ազատ արձակվեց: Հենց այս ժամանակ Արցախ վերադառնալու հարցին Բաբայանը պատասխանեց՝ ինչպես կորոշեն Հայաստանի իշխանությունները: Հիմա Սամվել Բաբայանը հայտնում է Արցախի ընտրություններին մասնակցելու մասին, արդյոք այդ որոշումը Հայաստանի իշխանությանն է եւ Արցախի հերոսի հետ կապված Նիկոլ Փաշինյանը որոշակի պլաններ ունի, թե Բաբայաննն ինքն է հիշեցնում իր մասին ու կամովին մատուցում սեփական ծառայությունները: Հորդորում արցախյան ղեկավարությանը, որպեսզի ոչ մեկ չխանգարի իր քաղաքական հավակնություններին, մարտ ամսին իր կողմնակիցները ստորագրահավաք կսկսեն, որպեսզի նախաձեռնեն սահմանադրական փոփոխություններ՝ հնարավոր դարձնելով իր մասնակկցությունն ընտրություններին: Բանն այն է, որ Արցախի Սահմանադրությունը պահանջում է, որպեսզի նախագահի թեկնածուն տասը տարվա մշտական բնակություն ունենա: Բաբայանը հայտարարում է, որ վերջերս կատարված սահմանադրական այդ փոփոխությունն արվել է հենց իր համար: Նա տեղեկացնում է նաեւ իր եւ Բակո Սահակյանի միջեւ << գծի>> մասին, որը ինքն է քաշել եւ դեռ անցած տարի ասել, որ անցյալի միջեւ է այդ գիծը.«Ինձ թվացել ա պետք ա հասկանային, որ Արցախի, Հայաստանի վիճակը էնքան ծանր է, որ անձնական քեն քշել-բան իմաստ չունի, կարող ենք պետություն, տարածքներ կորցնել, պետք չի դա անել, ես իմ պարտքը կատարել եւ ասել եմ առանց հետին մտքերի»,- հայտարարել է Բաբայանը:Հարցին, թե՝ իսկ Բակո Սահակյանը քաշե՞լ է, նա պատասխանել է. «Հարց է, քաշել է, թե չի քաշել, կերեւա մոտ ժամանակներս»: Բաբայանը Արցախի ղեկավարությանը հող հանձնելու հանցակցության մեղադրանք է ներկայացնում: Այս օրերին, երբ չորս կողմից բարձրաձայնում են ղարաբաղյան կարգավորման շուրջ վտանգավոր զարգացումների մասին եւ շրջանառության մեջ է դրվել <<խաղաղություն տարածքների դիմաց>> թեզը Բաբայանը հայտարարում է, որ այդ Սերժ Սարգսյանն է, որ 2017 թվականին ցանկացել է հողերը հանձնել: Մասնավորապես խոսելով 2017 թվականի խորհրդարանի ընտրությունից առաջ իր հայտնի ձերբակալության մասին, Բաբայանն ասել է, թե մենակ ընտրության հարց չէր, նաեւ Արցախի հարց էր եւ խորհորդ է տվել ՝ գնալ ու հարցնել Արցախի ներկայիս իշխանությանը, թե Հայաստանի նախագահը 2017 թվականին ինչի մասին է իրենց հետ խոսել Արցախում, ի՞նչ զիջումներ անելու մասին: «Էն որ հիմա բլբլում են, էն ժամանակ բլբլայիք,որ եկել էր ձեզ հետ խոսելու եւ ասել էր՝ ինչ է լինելու: Այն ժամանակ, որ խոսեիք մենք կհասկանայինք, որ դուք ինչ-որ մի հարց եք լուծում: Բոլորն այդ դահլիճում են եղել: Օրինակ, թող Ռազմիկ Պետրոսյանը կամ Արմո Ծատրյանը ասեն, թե ինչի մասին են խոսել», -հայտարարել է Բաբայանը: Ըստ ամենայնի Արցախի հերոսը իր քաղաքական հայտի հիմքն այսպես կոչված խառնակչությամբ է պնդացնում՝ հաշվի առնելով արցախցիների վերաբերմունքը տարածքների խնդրին, սակայն մյուս կողմից՝ մի շարք հարցադրումներ են ի հայտ գալիս,ինչու Սամվել Բաբայանն այդ մասին ավելի վաղ չէր հայտարարում, երբ հատկապես կանգնած էր դատարանի առջեւ, ինչու է, որ երբ խոսվում է Փաշինյանի վարած քաղաքականության մասին այդպես չի վրդովվում տարածքային զիջումների հարցից եւ պատասխանում.<<Պետք է հասկանալ ին է նշանակում տարածքային զիջում, ինչը ինչի դիմաց եւ այդ մասին տեղեկացնել ղարաբաղի ժողովրդին>>: Եւ առհասարակ, միթե Արցախն այն վայրն է, որտեղ կարելի է խառնակչությամբ հարցեր լուծել, չէ որ այստեղ միակ հակառակորդը սահմանից այն կողմ կանգնած հարեւաններն են ու հեչ պետք չէ ներսից թշնամիներ հռչակել: Դժվար է հավատալ, որ սա Բաբայանի կամքով է: Մյուս կողմից՝ Նիկոլ Փաշինյանից կախվածության փաստը Բաբայանը ցուցադրում է եւս մի քանի դրվագներով: Օրինակ նա չի ցանկանում կարծիք հայտնել Մարտի 1-ի գործից, լինելով Սեյրան Օհանյանի զինակիցն ու գաղափարական ընկերը Բաբայանը հրաժարվում է պատասխանել՝ ճիշտ չէ արդյոք Սեյրան Օհանյանը, ում կարծիքով Մարտի 1-ի գործի նմանօրինակ ընթացքը ուղղակի հարված է բանակի հրամանատարությանը: Բաբայանն ասում է, թե չի կարող կարծիք հայտնել, կսպասի դատարանի որոշմանը: Ինչեւէ, ցեցը գցված է եւ Արցախում այն չի կարող անարձագանք մնալ, միթե նպատակը արցախահայությանը պառակտելն է դրանից բխող հետեւանքներով, ու դա արվում է հերոսի ձեռքով: Չգիտակցելով կամ միգուցե լավ էլ գիտակցելով,որ Արցախում, այն էլ այսպիսի փխրուն ժամանակներում, երբ չորս կողմից խոսվում է ղարաբաղյան խնդրի կարգավորման գործընթացի երերուն վիճակի մասին,ընդդիմադիր շարժերը կարող են ճակատագրական ավարտ ունենալ, եւ թե ընդդիմության, թե իշխանության միակ պայքարը պետք է լինի ընդհանուր հակառակորդի՝ սահմանից այն կողմ կանգնաց հարեւանների դեմ: Անի Սահակյան