Փողը կա,դպրոցը կա, ո՞ւմ ենք սպասում. Նիկոլ Փաշինյանը բարկացավ

Կառավարության այսօրվա նիստում քննարկման դրվեց անհատույց սեփականության իրավունքով գույք հանձնելու և քանդման աշխատանքներ կազմակերպելու մասին ՀՀ կառավարության որոշման նախագիծը։ Զեկույցով հանդես եկավ Տարածքային կառավարման և զարգացման նախարար Սուրեն Պապիկյանը, ով նշեց, որ ծրագրով նախատեսված է, որ կառուցվող և վերակառուցվող դպրոցները սեյսմակայուն են լինելու առնվազն ինը բալ երկրաշարժի դեպքում և այս նպատակով նախագծերն անցնում են նաև միջազգային փորձաքննություն։ Վարչապետ Նիկոոլ Փաշինյանն ասաց, որ այս ծրագրով 46 դպրոց վերանորոգման ենթակա է, բայց հիմա միայն վեցն են հիմնանորոգում, ինչո՞ւ: Նա ասաց, որ տեմպն արագացնելու խնդիր կա, և դոնոր գործընկերների հետ պետք է ինտենսիվ աշխատել: “Հիմա մենք վարկային ծրագիր ունենք՝ 88 մլն դոլար, այս 46-ից քանիսի շինարարության համար է բավարար: Համենայնդեպս, ոչ բոլորին է բավարար, և մենք պետք է իսկապես հասկանանք”,- ասաց նա: Վարչապետին տեղեկացվեց, որ 88 մլն դոլարով ու կառավարության կողմից հատկացվելիք 20 մլն դոլար համաֆինանսավորմամբ այս բոլոր դպրոցների հիմնանորոգումը կավարտվի: “Եթե գումարն ունենք, դպրոցներն ունենք, ինչո՞ւ ենք այսպիսի տեմպով առաջ գնում”,- հարցրեց վարչապետը: Սուրեն Պապիկյանն ասաց, որ 18.5 մլն դոլար համաֆինանսավորման խնդիր կա, կառավարությունը դա պետք է հատկացնի, բայց նախորդ տարի դա դանդաղել է: Մյուս դպրոցներն արդեն պետք է քննարկեն, հասկանան: “Չէ, ես նկատի ունեմ փողը կա, դպրոցը կա, ո՞ւմ ենք սպասում: Համաֆինանսավորման խնդի՞րն է: Այսինքն՝ նկատի ունեմ այդ տեմպով եթե գնանք, վեց ամսից էլի վեցի մասին կխոսենք: Ինչի՞ մենք ամեն շաբաթ մի դպրոցի հարց չենք լուծում, ինչի՞ բոլորի հետ աշխատանք չենք տանում”,- հարցրեց վարչապետը: Սուրեն Պապիկյանն ասաց, որ պետք է քննարկեն համապատասխան գերատեսչությունների հետ ու անցնեն առաջ: Վարչապետն ասաց, որ առանց քննարկելու պետք է գնալ առաջ, համաֆինանսավորման աղբյուրն էլ պետք է գտնել ու գնալ առաջ: Այսինքն՝ վարկային միջոցը վերցված է, պետք է արդյունավետ ու արագ օգտագործել: “Հետևաբար, այս 46 դպրոցների հարցերը մենք լուծում ենք”,- ասաց նա: Վարչապետ Նիկոլ Փաշինյանը նկատեց, որ այս հարցի համատեքստում պետք է ներառել նաև դոնոր գործընկերների հետ ինտենսիվ աշխատանքը, ԵՄ հետ համագործակցության ճանապարհային քարտեզում ևս փորձել ներառել այս ծրագրերը։ «Որակի նկատմամբ վերահսկողությունը պետք է շատ լուրջ լինի, «պետական շինարարություն» մտածողությունը պետք է վերացնել»,-նշեց վարչապետը։ Նիկոլ Փաշինյանն ասաց, որ եթե դպրոցաշինությունն այս տեմպերով ընթանա, կառավարությունն ուղղակի չի հասցնի, մյուս դպրոցներն էլ կքանդվեն ու կարիք կունենան վերանորոգման: Եվ կստացվի, որ վերանորոգման ցիկլից չեն կարողանում դուրս գալ: Որոշմումը միաձայն ընդունվեց կառավարության կողմից։