Վարչապետի կողմից մամուլը հռչակվել է թշնամի․ Նարեկ Սամսոնյան

Վարչապետի կողմից մամուլը հռչակվել է թշնամի: Սա փաստ է,-Politik.am-ի հետ զրույցում ասաց «Քաղաքացիական գիտակցություն» հասարակական կազմակերպության (հկ) նախագահ, քաղաքագետ  Նարեկ Սամսոնյանը: «Այսինքն՝ մամուլը հերթական թշնամին է Ազգային ժողովից, «հակահեղափոխականներից» և մնացյալից հետո: Օլիգարխները մի գիշերում դարձան գործարարներ, իսկ մամուլը հիմա խանգարում է: Սա շատ բացասական երևույթ է: Ընդհանրապես, նրանք, ովքեր ասում են, որ մամուլը երբեք այսքան ազատ չի եղել, նվազագույնը, այս պահի իշխանության մաս կազմող մարդիկ են»,-ասում է Սամսոնյանը: Նարեկ Սամսոնյանի խոսքով՝  բոլոր նորմալ երկրներում հասարակությունը իշխանության վարկածին հակված է ավելի քիչ հավատալ, քան հակառակորդների վարկածին, կամ՝ երկուսը միասին համադրել և ինչ-որ բան ստանալ.«Ըստ էության, Նիկոլ Փաշինյանի կողմից մամուլը ուղղակիորեն ճնշումների է ենթարկվում: Մենք ունենք Հայաստանի պատմության մեջ բացառիկ երևույթ վերջին 10-20 տարիների ընթացքում, երբ այսքան շատ են ճնշում մամուլը: Այսօր բազմաթիվ լրատվականների ճնշման օրինակներ ունենք»: Սամսոնյանն ասում է՝ բացի ոստիկանական ճնշումները տեղի է ունենում նաև մի հետաքրքիր իրավիճակ, երբ Հայաստանում հացադուլի պատճառով բանտում մահանում է լրագրող, ու այդ ամենը արվում է ղարաբաղյան հարցի համատեքստում, Ալիևի հետ գաղտնի բանակցություներով, ոչ ֆորմալ հանդիպումների ֆոնին.«Ակնհայտ է՝ ինչու է մամուլը խանգարում Նիկոլ Փաշինյանին. որովհետև մամուլը բարձրաձայնում է այն բոլոր թերությունները, որոնք կան ներկա իշխանությունների գործելակերպում: Ըստ էության, իրենց ասածին ցանկացած հակադիր միտք ապատեղեկատվություն են համարում: Իսկ միգուցե՞ ամենաշատ ապատեղեկատվություն տարածողները իրենց լրատվամիջոցներն են, որոնք, ի դեպ, քիչ չեն: Սա այն բացառիկ իրավիճակներից է, երբ իշխանությունը ունի ամենաշատ լրատվամիջոցները»: Մեր այն նկատառմանը, որ Նիկոլ Փաշինյանը հայտարարել էր, թե հայաստանյան լրատվամիջոցների 90%-ը գտնվում է նախորդ իշխանությունների ձեռքում, Նարեկ Սամսոնյանը պատասխանում է.«Ինչպե՞ս են չափել այդ 90%-ը: Կամ ի՞նչ է նշանակում նախորդ իշխանություն: Մեդիան ունենում է սեփականատեր, որի անունը գրված է ռեգիստրում: Եթե, օրինակ, ասեն՝ այս լրատվամիջոցն ունի այլ սեփականատեր, բայց այլ անունով է գրանցված, նշանակում է՝ պետությունը ընդունում է, որ իրեն խաբում են: Նիկոլ Փաշինյանի միտքը հետևյալն է՝ նրան դուր չի գալիս, որ մեդիան սկսում է իր թերությունները տեսնել Արցախի ճակատում, նրան դուր չեն գալիս իր պատգամավորների խայտառակ հարցազրույցները, որոնք մեկը մյուսի հետևից տարածվում են ու դառնում պարսավանքի և ծաղրանքի առարկա, և փորձում է ճնշել այն լրատվամիջոցներին, որոնք իրեն չեն սատարում, այսպես կոչված, հեղափոխությանը, որը, իրականում, հեղափոխություն չէր»: Նարեկ Սամսոնյանի կարծիքը հարցրինք նաև վարչապետ Նիկոլ Փաշինյանի նախկին խորհրդական Արսեն Խառատյանի այն հայտարարության մասին, որ պատրաստվում են բոյկոտել ու արհամարհել որոշ լրատվամիջոցների, արդյո՞ք չեն արժանանա ԶԼՄ-ների ավելի բուռն արձագանքին.«Միանշանակ: Ես էլի եմ ասել, ու հիմա էլ կպնդեմ՝ Նիկոլ Փաշինյանի այս արշավը լրատվամիջոցների նկատմամբ նույն հեզությամբ, հանդուրժողականությամբ ու խոնարհվելով չի ավարտվելու, ինչպես հանրապետականների դեպքում եղավ: Հանրապետականները վախեցան, նրանք մեղավոր էին նաև, և միանգամից կապիտուլացվեցին: Մամուլը ոչ միայն չի կապիտուլացվում, այլ ամեն օր մամուլի կողմից Նիկոլ Փաշինյանի նկատմամբ վերաբերմունքի փոփոխությունը ակնհայտ է լինում: Փաշինյանը փորձում է ժողովրդավարության անվան տակ ԶԼՄ-ներին ճնշել և փորձել պարտադրել այն, ինչ պարտադրեց հանրապետականների և մնացածին, այսինքն՝ համակերպվել այն մտքին, թե Հայաստանում թիվ 1 նյուզմեյքերը ինքն է, սակայն դա չի հաջողվելու անել նաև ԶԼՄ-ների դեպքում»: Քաղաքագետի կարծիքով՝ ժողովուրդն ինքն էլ արդեն տեսնում է, որ իրականում Նիկոլ Փաշինայնի իշխանության գալը հիմնված է եղել ստի ու կեղծիքի վրա.«Տեսան, որ Սաշիկը ոչ մի բան 50% չուներ, տեսան, որ արագաչափերը, որոնք Նիկոլ Փաշինյանը գալիս էր հանելու, ոչ թե հանեց, այլ ավելացրեց, տեսան, որ մարդիկ պարգևավճար են ստանում, որ կաշառք չվերցնեն: Ժողովուրդը ավելի շատ է տեսնում, քան Նիկոլ Փաշինյանը փորձում է ու կարծում է, թե թաքցնում է: Դա հակառակ ազդեցությունն է տալու: Ֆիզիկայում հայտնի օրենք կա՝ ցանկացած ազդեցություն ստանում է նույն ուժով հակազդեցություն, և այսօր Նիկոլ Փաշինյանը սխալ ուղղությամբ է պատերազմ հայտարարել ու թշնամի գտել: Մամուլը երբեք չի խոնարհվի Նիկոլ Փաշինյանի և որևէ իշխանության առաջ: Մամուլը Հայաստանում վաղուց բավականին ինքնուրույն է, և ամեն հնարավոր ձևով պետք է հակադարձի այս ճնշումներին: Եվ, վերջիվերջո, պետք է հասկացնել Նիկոլ Փաշինյնաին, որ իրականում ինքը չէ, որ պետք է մամուլի հետ խոսի այդ տոնով»-ամփոփեց Նարեկ Սամսոնյանը: