Ինչ է մտածել Նիկոլ Փաշինյանը Սերժ Սարգսյանի հարցում

Սերժ Սարգսյանը վկայի կարգավիճակով փետրվարի 1-ին շուրջ վեց ժամ հարցաքննվել է։ Հարցաքննվել է «Մարտի 1»-ի գործի շրջանակներում, հարցաքննություն չի ավարտվել և դեռ պետք է շարունակվի: Սերժ Սարգսյանը 2008 թվականի մարտին դեռ Հայաստանի վարչապետն էր, և փետրվարին տեղի ունեցած ընտրությունների արդյունքներով ընտրվել էր Հայաստանի նախագահ: Այսինքն նա գլխավոր շահառուներից մեկն էր, եթե չասենք ամենագլխավորը, ով այդ դեպքերից հետո վերցրեց իշխանությունը։ Չնայած դրան դեռ հստակ չէ արդյոք Սերժ Սարգսյանը վկայի կարգավիճակից կհայտնվի մեղադրյալի կարգավիճակում։ Մի բան հստակ է, որ Սերժ Սարգսյանը հայտնվել է ՀՀ իշխանությունների ուշադրության ներքո։ Վերջին շրջանում լրատվամիջոցներ հայտնեցին նրա դեմ նախկին պաշտոնյաներից մի քանիսի ցուցմունքների տեղեկատվության մասին։ Մասնավորապես, որ նախկին գործարար Միխայիլ Բաղդասարովն է սկսել ցուցմունքներ տալ նախկին նախագահ Սերժ Սարգսյանի դեմ: Բաղդասարովը Սերժ Սարգսյանի իշխանության օրոք կորցրեց Հայաստանում ունեցած իր հիմնական բիզնեսները՝ նավթամթերքի ներմուծումից մինչեւ «Արմավիա» ընկերության սնանկացում եւ հեռացավ Հայաստանից: Տեղեկություն կա նաեւ Սեյրան Օհանյանի ցուցմունքի մասին, նա էլ ՊՆ-ի դեմ հարուցված խոշոր չարաշահումների գործով է Սերժ Սարգսյանի կողմը «բոչկա գլորել», այս շարքում է նաեւ նախկին ոստիկանապետ Վովա Գասպարյանը, նա էլ Սերժ Սարգսյանին «փուռն» է տվել քրեական հեղինակություն Կանեւսկոյին կեղծ անձնագիր տրամադրելու գործի շրջանակներում, որը հարուցված է իր դեմ, բայց Գասպարյանը քննչական մարմիններին հայտնել է, թե ինքը Սերժ Սարգսյանից է նման հանձնարարական ստացել։ Ակնհայտ է, որ Սերժ Սարգսյանի դեմ ինչ-որ ալիք է բարձրացել։ Կամ Նիկոլ Փաշինյանը փորձում է շոու սարքել հերքելով օդում կախված այն լուրերը, որ ինքը կուլիսային բանակցությունների արդյունքում պարտավորվել է իշխանության անցնցում փոխանցման դիմաց Սարգսյանին «անձեռնմխելիություն» շնորհել: Հատկապես, որ վերջին ժամանակները կոչեր են հնչում Մարտի 1-ի գործում ներգրավվել դրան առնչվող բոլոր կողմերին՝ Սերժ Սարգսյան, Լեւոն Տեր-Պետրոյսան, ինչպես նաեւ Նիկոլ Փաշինյան։ Հատկապես, որ ամբոխին տեսարաններով կերակրելու խնդիր կա, երբ տնտեսական զարգացում գոլություն չունի, երբ իրական փոփոխություններն այդպես էլ ուշանում են, ապա այլ բան չի մնում, քան արյունի կարոտ ամբոխին սնել նոր արյունով։ Սերժ Սարգսյանի դեմ իրավական այս գրոհը կարող է նաեւ այլ բացատրություն ունենալ։ Նա կարող է ամեն պահ ապակայունացնել ներքաղաքական իրավիճակն ու օգտվել առաջին իսկ հարմար հնարավորության դեպքում, եւ խարխլել Նիկոլ Փաշինյանի իշխանության երերացող հիմքերը։ Գաղտնիք չէ, որ Նիկոլ Փաշինյանը նախկին իշխանության կարկառուն գործիչներից շատռերին հենց այս պրիզմայով է նայում՝ ով կարող է քաղաքական կոնսոլիդացիա ձեւավորել եւ սպառնալիք դառնալ իր իշխանությանը, հենց այս հարթության մեջ էր, որ ինչ որ պահի արշավ սկսվեց նաեւ նախկին վարչապետ Հովիկ Աբրահամյանի դեմ, այս նկատառումով է նաեւ, որ անազատության մեջ է պահվում Ռոբերտ Քոչարյանը։ Այնպես որ Սերժ Սարգսյանին կփակեն, թե ոչ, դեռ դժվար է ասել, բայց որ իշխանությունը շատերի պես նրան էլ է փորձում պահել վերահսկելի դաշտում, արդեն հայտնի է։ Անի Սահակյան