«Սերժ Սարգսյանի նկարի հետևում մի աղջիկ կա կանգնած, գուշակեցի՞ք ով է». Կարպիս Փաշոյան

Հրապարակախոս Կարպիս Փաշոյանը ֆեյսբուքյան իր էջում գրել է. «Սերժ Սարգսյանի նկարի հետևում մի աղջիկ կա կանգնած: Գուշակեք, թե ով է, չգուշակեցի՞ք, ԱԺ պատգամավոր Թագուհի Ղազարյանն է: Հեղափոխությունը սկսել է նաև այսպես. ընդամենը 10-15 հոգու անհույս ու անհեռանկար թվացող ակցիայով: Երբ հիմա ասում են, թե Թագուհին ընդամենը քայլելու արդյունքում է պատգամավոր դարձել, պարզապես մեղմ ժպտում եմ ու անցնում առաջ: Չէի պատկերացնի, որ ինչ-որ մի օր հեղափոխական քայլը կարող է այդ աստիճան արժեզրկվել: Իհարկե բոլորն էլ քայլել ու փողոց են փակել, բայց Թագուհին էն քչերից է, որ քայլել է հատկապես ամենավտանգավոր շրջանում: Այն ժամանակ նրան հայհոյողներից շատերը լցրել էին տակներն ու տներից դուրս չէին գալիս: Թե չէ շատերն են քայլել, բայց վտանգի չեզոքացումից հետո անշառ քայլելու վարձքը ո՞րն է: Թագուհին քաջ աղջիկ է, ինձնից էլ քաջ: Եղել են պահեր, որ ես վախեցել եմ, բայց ինքը՝ ոչ: Թագուհին չափազանց խելացի ու ինտելեկտուալ աղջիկ է: Նա գրականագետ է՝ հայ նոր ու նորագույն գրականության գիտակ: Թագուհին սկզբունքային ու անկաշառ աղջիկ է: Մի՞թե այսպիսի մարդիկ պետք չեն մեր հանրությանը: Ես հասկանում եմ, որ ներկայումս ֆեյսբուքի առաջնային շարժիչ ուժերն են անասնային բնազդը, մարդատյացությունն ու մարդկանց հենց այնպես ոչնչացնելու մոլուցքը: Ամենավերջին անասունի պես մտնում ու կնոջը հայհոյում են ու չեն էլ մտածում, որ նույնը կարող են անել իրենց աղջիկների ու կանանց հետ: Բայց էս բոլորը անցողիկ են, ժամանակը բերել է, ժամանակն էլ կտանի: Միայն սկզբունքային մարդն է մնացողը՝ մինչև վերջ կանգնած մնացողը: Թագուհին, ես ու բոլոր մնացյալ մեր ընկերները ըմբռնումով ենք մոտենում էս ամեն ինչին: Թո՛ղ վերամբարձ հնչի, բայց մենք տարիներ շարունակ պայքարել ենք հանուն խոսքի ազատության, որ մարդիկ երբեք չվախենան ու ինչու չէ՝ նաև մեզ հայհոյեն, քննադատեն ու ոչնչացնեն»: