Երևանի քաղաքապետարանում 2 մլն դրամ պարգևավճար ստացող է եղել. ցանկ

Երևանի քաղաքապետարանում նախորդ տարեվերջին ամենաբարձր պարգևավճարը ստացել է անշարժ գույքի կառավարման վարչության պետ Արսեն Ամյանը: Երևանի քաղաքապետարանի կայքում հրապարակված փաստաթղթի համաձայն՝ Արսեն Ամյանի միայն պարգևատրման գումարը կազմել է 2 մլն 049 հազար 800 դրամ, գումարած 13-րդ աշխատավարձ՝ 346 հազար դրամ։ Ամյանը քաղաքապետարանի հնաբնակներից է, տասը տարուց ավելի է քաղաքապետարանում է։ Այս մասին գրում է hraparak.am-ը: Արսեն Ամյանից հետո երկրորդ խոշոր պարգևատրումը ստացել է իրավաբանական վարչության պետ Զավեն Առաքելյանը՝ 1 մլն 666 հազար 670 դրամ: Նա ստացել է նաև 13-րդ աշխատավարձ՝ 346 հազար դրամ: Ուշագրավ է, որ նրանց պարգեւատրումների մասին քաղաքապետ Հայկ Մարությանը ֆեյսբուքյան տեսանյութում չխոսեց, այլ միայն հրապարակեց փոխքաղաքապետերի ու վարչական շրջանների ղեկավարների՝ տարեվերջին ստացած պարգևավճարների չափը։ «Երևանի քաղաքապետի առաջին տեղակալ՝ 956 հազար, որն առանց հարկերի անում է 688 հազար դրամ, Հայկ Սարգսյան՝ քաղաքապետի տեղակալ՝ 886 հազար, որը մաքուր անում է 637 հազար դրամ, Հարությունյան Սերգեյ՝ մաքուր՝ 637 հազար դրամ, Վիրաբյան Տիգրան՝ մաքուր՝ 937 հազար դրամ և Երևանի գլխավոր ճարտարապետ Արթուր Մեսչյան՝ մաքուր՝ 637 հազար դրամ։ Վարչական շրջանների բոլոր 12 ղեկավարները մաքուր ստացել են 288 հազար դրամ, Հայկ Մարության՝ Երևանի քաղաքապետ՝ 0 դրամ, իսկ մնացած ցուցակը կհրապարակվի քաղաքապետարանի պաշտոնական կայքէջում »,- տեսաուղերձում ասում է Մարությանը։ Ներկայացնում ենք քաղաքապետարանի կայքում հրապարակված փաստաթուղթը, որից պարզ է դառնում, թե ով ինչքան պարգեւատրում է ստացել։