Եթե պահանջվում է «զոհ», ապա ընդամենը մեկը…

Անցնող շաբաթվա ընթացքում Հայաստանը Սիցիլիա էր հիշեցնում, հանցագործությունը հանցագործության հետեւից, մայրաքաղաքի մի կետում զինված հարձակվում են վարկային կազմակերպության գրասենյակի վրա, մեկ ուրիշում կացնով ներխուժում բանկերից մեկը, երրորդ տեղում արդեն կրակոցներ են հնչում, ավելի ճիշտ փոխհրաձգություն, որը ողբերգական ավարտ է ունենում: Ամենուր քրեական քրոնիկոն է, սպանություն, ծեծուջարդ եւ այսպես շարունակ: Իրավիճակն այս մի բացատրություն ունի՝ Հայաստանի հպարտ ոստիկանությունն ու իրավապ համակարգն իրենց տեղում չեն, ունի նաեւ երկրորդ բացատրությունը՝ Նիկոլ Փաշինյանի նախընտրական համաներումը, որը բանտերից ազատել է տարատեսակ հանցագործների: Նույն շաբաթում, երբ Հայաստանում մոլեգնում է շղթայական հանցագործություններ, կալանավայրում մահանում է մոտ քառասուն օր հացադուլ հայտարարած Մհեր Եղիազարյանը, Խաչիկ Ասրյանի տեղակալը Հայոց Արծիվներ ՀԿ-ում, որը նաեւ կայքի խմբագիր էր: Եթե ուղիղ ձեւակերպենք, նա անազատության մեջ էր գլխավորապես այն բանի համար, որ կապ ուներ նախկին իշխանությունների հետ: Ու նրա մահվանից հետո թվում էր արդարադատության նախարար Արտակ Զեյնալյանը պետք է հրաժարական տար, այդ պահանջը պետք է բարձրացնեին Հայաստանի իրավապաշտպան կազմակերպությունները, բայց պարզվում է սորոսականների համար մարդու իրավունքները վերջանում են այն կետում, որտեղ սկսվում է իրենց անձնական շահը, իշխանության հպատակությունն ու սորոսապաշտությունը, եւ ընդամենը մեկ-երկու բողոքի ձայն ու քար լռություն պատկան մարմնի կողմից: Թվում էր, թե նույնկերպ պետք է իր հրաժարականը ներկայացներ նաեւ ոստիկանապետ Վալերի Օսիպյանը, քանի նոր Հայաստանում հպարտ քաղաքացիներին սնում էին այն պատրանքներում, որ հիմա ամեն ինչ լավ է, որ քրեական տարրեր, քրեածին իրավիճակներ, բեսպրեդել չկա, սակայն ի հեճուկս այդ ամենի տեղի է ունենում փոխհրաձգություն նախկին պատգամավոր Մելիք Մանուկյանին պատկանող օբյեկտում, որի արդյունքում կա զոհ եւ մեկ տասնյակի հասնող վիրավորներ: Գործի մասին մի քանի օր է խոսվում է, գրվում, սակայն Վովա Գասպարյանի ժառանգորդ Վալերի Օսիպյանը շարունակում է իր կնքահոր ոճը եւ նման իրավիճակում զոհեր է մատուցում: Հայտնի դարձավ, որ ոստիկանապետի հրամանով աշխատանքից ազատվել է ոստիկանության Կոտայքի մարզային վարչության պետ, ոստիկանության գնդապետ Արամ Հովհաննիսյանը: Ինչպես նաեւ՝ ոստիկանության Աբովյանի բաժնի պետ Հովհաննես Մարտիրոսյանը:Նրանք երկուսն էլ ուղարկվել են կադրերի ռեզերվ: Կասկած չկա, որ այս պաշտոնանկությունները կապված են վերոնշյալ միջադեպի հետ, նախկին պատգամավորի օբյեկտը գտնվում է Աբովյանի տարածքում, ինչպես որ կասկած չկա՝ ինչ որ ժամանակ հետո պաշտոնանանկ ոստիկանները կվերականգնվեն այլ պաշտոնում, ինչպես անում էր Վովա Գասպարյանը: Այնպես որ, պետք չէ <<զոհեր>> մատուցել, ապացուցելու համար, որ իրավիճակը ձեր ձեռքերում է եւ կպատժվեն բոլոր նրանք, ում պատասխանատվության տարածքում կլինեն նման միջադեպեր: Գլխավոր պատասխանատուն դուք եք, ու եթե պահանջվում է <<զոհ>>, ապա ընդամենը մեկը… Անի Սահակյան