Տեխնիկական լոլոներ

Երկու օր է ակտիվ քննարկվում է Արարատ Միրզոյանի մի վերարկուի պատմությունը: Կա տեսանյութ, որում երեւում է, թե ինչպիսի ինքնավստահությամբ է ԱԺ նախագահի պաշտոնը մի քանի օր առաջ ստաձնած, ոչ հեռավոր անցյալում դասախոսությամբ զբաղվող Միրզոյանը արագ քայլում դեպի իրեն սպասող ջիփը, նրա ետեւից էլ մի տղամարդ՝ ձեռքին վերարկու, մեքենային հասնելու պես տղամարդը հագցնում է Միրզոյանի վերարկուն, նրա համար արագ բացում ավտոմեքենայի դուռը,իրեն էլ արագ գցում մեքենայի առջեւի նստարանը, որ քշեն-հեռանան: Ֆեյսբուքահայությունը տարբեր անուններով կոչեց Միրզոյանի այս արարքը՝ չտեսություն, գյորմամիշություն, չտեսավ պատից կախ, տեսավ ճակտից կախ, ոմանք առավել հետուն գնացին՝ հոխորտալով, թե միթե սրա համար էինք մենք հեղափոխություն արել: Չուշացավ նաեւ Արարատ Միրզոյանի արձագանքը, բնականաբար, Ֆեյսբուքում: «Սիրելի ընկերներ, բարեկամներ և չարեկամներ, Անհրաժեշտ եմ համարում անդրադառնալ ձեր ուշադրությանն արժանացած մի քանի թեմայի և ներկայացնել մի քանի տեխնիկական մանրամասներ։Այո, ԱԺ նախագահի համար օրենքով սահմանված է պետական պահպանության ռեժիմ։ Պարզվում է՝ ԱԺ նախագահը որևէ տեղ այցելելիս իր վերարկուն պիտի թողնի ոչ թե ընդհանուր հանդերձարանում, այլ իր անվտանգության աշխատակիցների մոտ։ Ահա թե ինչպես է իմ վերարկուն հայտնվել իմ անվտանգության պետի մոտ։ Կարո՞ղ էի ինքնուրույն հագնել վերարկուն։ Իհարկե։ Բայց մի շատ տեխնիկական, գուցե նաև տափակ նրբություն կա։ Համաձայնեք՝ տեսախցիկների առջև վերարկուի մյուս թևքը շոշափելով որսալը և ապա ծռմռված օձիք ուղղելը ևս այնքան էլ հրապուրիչ հեռանկար չի։ Մանավանդ որ, ինչպես տեսանյութում երևում է, արագ շարժվելու խնդիր կար՝ մյուս մեքենաներն էին հերթով մոտենում»,-այսպիսի անկապ տեխնիկական մանամասեր է ներկայացրել Արարատ Միզրոյանը , որոնցով փորձում է արդարանալ: Սակայն դրանից իրականությունը չի փոխվում,միթե այդ պետական ռեժիմը սահմանում է նաեւ, որ պետական բարձրաստիճան այրի անվտանգությունն ապահովող մարդիկ՝ թիկնապահները պետք է նրանց հանեն-հագցնեն, նրանց գլխին անձրեւանոց պահեն, կամ աթոռը մոտեցնել մարմնի համապատասխան մասին, որպեսզի պաշտոնյան նստի: Միրզոյանն ինքն ավելի է բարդացնում վիճակը շարունակելով ինքն իր հետ երկխոսությունը.<<Կարիք կա՞ր մեքենա նստելուց առաջ վերարկու հագնել։ «Ինչ է, ցուրտ էր մեքենայում»,- հեգնում եք։ Սիրով տեղեկացնեմ։ Ցուրտ չէր, բայց բավականին սառն էր՝ իմ մեքենայի շարժիչը միացրած չենք պահում, մինչ ես որևէ միջոցառման եմ մասնակցում>>։ Պատկերացնում եք սա ասում է մի պաշտոնյա, ով իշխանության հասնելու համար պատրաստ էր օրերով, ցրտին, քամուն , անձրեւին գիշերել դրսերում, քայլարշավի ժամանակ, ավելին, ով եւ իր շատ թիմակիցներ խոստանում էին, որ չէին կրկնելու նախորդներին, չեն մսխելու ժողովրդի հարկերով ձեւավորված բյուջեն, իրենց ծախսերում լինելու են մինիմալ, որ ոտքով էլ կգնան աշխատանքի: Պաշտոնը նրանց փափկամորթ է դարձրել, նրանք հիմա չեն դիմանում փոքրիկ դժվարություններին, իսկ Հայաստանում քանի անտուն մանուկներ են գիշերում բաց երկնքի տակ ու շատ-շատերի ծնողների սպասումները հենց ձեր՝ հեղափոխություն իրականացրած ուժի հետ է կապված: Մյուս կողմից, պետք չէ անողոքաբար քննադատել ԱԺ նախագահին, մի քանի ամիս առաջ Նիկոլ Փաշինյանը չէր, որ նախընտրական այցելություններից մեկի հյուրասիրության ժամանակ բերանը սրբած անձեռոցիկը դրեց թիկնապահի ձեռքը:Էլ ինչ սպասեինք Արարատ Միրզոյանից: Անի Սահակյան