Փոշմանել են
Ազգային ժողովում 4+4+4 ձևաչափով երկրորդ արարն անցել է լարված մթնոլորտում: Իշխանությանը պահանջներ ներկայացնող ընդդիմադիրներն ու քաղհասարակության ներկայացուցիչները նախ իրենց մեջ են որոշ հարցեր պարզել, ինչը վերածվել է լեզվակռվի: Քննարկման սկզբում ԱԺ աշխատակազմի ղեկավար Հրայր Թովմասյանը ներողություն է խնդրել լրատվամիջոցների ներկայացուցիչներից, որ նախորդ փակ քննարկումից հետո քննարկման որոշ հատվածներ հասու են դարձել ընդամենը մեկ լրատվամիջոցի:Նշենք, որ այսօր Ա1 պլյուսը փակ քննարկումից ձայնագրություն էր հրապարակել, որտեղ Լեւոն Զուրաբյանն ու փաստաբան Տիգրան Եգորյանը խիստ քննադատում են իշխանություններին: ԲՀԿ նախագահ Նաիրա Զոհրաբյանը խիստ վրդովված տոնոլ կացնային հայտարարություն է արել, թե տեղեկատվությունը տարածողը պետք է մտածի՝ տղամարդ է, թե՝ ոչ: «Ջենթլմենավարի, կներեք՝ տղամարդավարի պամանավորվածություն էր ձեռք բերվել,որ նիստը փակ է, հիմա առնվազն ինքը՝ տարածողը, պետք է մտածի՝ տղամարդ կոչվելու իրավունք ունի՞, թե՝ ոչ»,- նետել է Զոհրաբյանը, ում հուժկու հարվածը հասել է նպատակակետին: Արձագանքել է Տիգրան Եգորյանը. «Էտ վիրավորանքները խնդրում եմ Ձեզ պահեք, դրանք իրենց տեղում չեն հասցեագրված: Կոնկրետ ես իրականացրել եմ ձայնագրություն, հիմա էլ իրականացնում եմ եւ ես էլ մի քանի ընկերների հատվածաբար, ում անհրաժեշտ եմ համարել տրամադրել եմ, եւ համարում եմ, որ ճիշտ եմ արել: Երկրորդը՝ պայմանավորվածություն ջենտլմենական եւ ոչ ջենտլմենական չի եղել: Էտ ամեն ինչը ձայանագրվել է, կարող ենք վերծանել եւ լսել եւ երկրորդը՝ այդ հանդիպումը փակ չի եղել: Այն եղել է առանց տեսախցիկների, բայց հրապարակային»,- ասաց Տիգրան Եգորյանը՝ նշելով, որ անընդունելի է, որ պատգամավորն այդպիսի ոճով է խոսում:«Դուք ինձ մի սովորացրեք ես ինչ ոճով խոսեմ, ես կրկնում եմ՝ առնվազն անպարկեշտություն է ձեռք բերված ձայնագրությունը հրապարակել, այն ինչը հրապարակման ենթակա չէ: Ես պատասխանեցի, ես ասեցի, շատ տգեղ բան եք արել»,- հակադարձեց Նաիրա Զոհրաբյանը:Միջադեպն առիթ է դարձել, որ քննարկումը բաց անցկացնեն: Ամենամեծ անակնկալն այն է, որ պարզվեց ՀԱԿ-ը փոխել է իր դիրքորոշումը եւ այլեւս չի ընդունում էլեկտրոնային ոչ գրանցման տարբերակը, ոչ էլ քվեարկությունը: Լևոն Զուրաբյանը հայտարարել է, որ իրենք դեմ են ցանկացած էլեկտրոնային համակարգի ներմուծմանը ընտրական պրոցեսի մեջ, լինի գրանցման, քվեարկության, թե հաշվառման նպատակով: Զուրաբյանը մանրամասնել է, որ իրենց դիրքորոշում պայմանավորված է մի շարք հանգամանքներով:Առաջինն այն է, որ ՀԱԿ-ը ստեղծել է տեխնոլոգիական մի խումբ, որն ուսումնասիրել է տարբեր երկրներում այդ փորձը, հանդիպել ոլորտի մասնագետների հետ և պարզ ասվել է, որ որևէ համակարգի ներդրումը պահանջում է առնվազն 3-4 տարի ժամանակ, որ դա հուսալի լինի:«Ցանկացած լուրջ մասնագետ կհրաժարվի մեկ տարում կառուցել էլեկտրոնային համակարգ, և Ձեր կողմից հրավիրված Գրիմերն ասաց, որ եթե իշխանությունն ունի ընտրակեղծարարության փորձ, ապա այն այդ համակարգով կկրկնապատկվի»: Մինչդեռ, այս տարվա հունվարին, երբ դեռ Ընտրական օրենսգրքի նախագիծը հանրության դատին չէր ներկայացվել ու այն մշակման փուլում էր ՀԱԿ-ը յոթ կետից բաղկացած առաջարկներով հանդես եկաց, որոնցում ներառված էր նաեւ էլեկտրոնային քվեարկության անցնելու կետը: Մասնավորապես ՀԱԿ-ն առաջարկում էր.<<Բազմակի քվեարկության բացառման նպատակով կամ պետք է կիրառվի մատների թանաքոտման եւ ստուգման հուսալի մեխանիզմ, կամ, ինչն ավելի գերադասելի է, անցում կատարվի մի շարք երկրներում հաջողությամբ կիրառվող` մատնահետքով էլեկտրոնային քվեարկության ժամանակակից համակարգին>>։ Ստացվում է, որ ՀԱԿ-ն ինքն էլ դեռ չի կողմնորոշվել, թե ինչ է ուզում եւ արդյոք արժե վստահել մյուս առաջարկներին ու պնդումներին, որոնք ներկայացվում են իբրեւ ընտրությունների վերահսկման հստակ մեխանիզմներ: Գուցե մինչեւ ընտրական օրենսգրքի ընդունումը ՀԱԿ-ը հրաժարվի՞ մնացյալ պահանջներից : Այս ամենից հետո այլեւս անլուրջ է լուրջ մոտեցում ցուցաբերել այս քննարկումներին ու ընդդիմության ամպագոռգոռ հայտարարություններին:
Անի Սահակյան