Գնդակն ուղարկվում է այլ դաշտ

Կառավարությունն այսօրվա նիստում որոշակի վերապահումներով դրական եզրակացություն է տվել ԱԺ անկախ պատգամավոր Էդմոն Մարուքյանի օրենսդրական նախաձեռնությանը, որով պատգամավորն առաջարկում է Քրեական օրենսգրքում փոփոխություն անել եւ ընտրակեղծարարներին տուգանելու փոխարեն միայն ազատազրկել: Էդմոն Մարուքյանը իր հեղինակած նախագծում, մասնավորապես, առաջարկում է օրենսգրքի 153-րդ հոդվածի (մեկից ավելի անգամ կամ այլ անձի փոխարեն քվեարկելը) սանկցիայից հանել տուգանքը՝ որպես պատժատեսակ, և թողնել միայն 2-3 տարով ազատազրկման ձևով պատիժը: Նախագծի մշակման համար հիմք է եղել այն հանգամանքը, որ Հայաստանում անցկացված «բոլոր քվեարկություններից, այդ թվում նաև վերջին սահմանադրական հանրաքվեից հետո 153-րդ հոդվածով մեղադրվող անձանց նկատմամբ մշտապես պատիժ է նշանակվում 500 հազարից 600 հազար դրամի չափով տուգանք», ինչը «համարժեք չէ այլ քաղաքացիների քվեները գողացող և դրանով ժողովրդավարության դեմ ոտնձգող անձանց կատարած հանցանքին»: «Ակնհայտ է, որ հանցագործության բացահայտման դեպքում, երբ որպես պատիժ կիրառվում է տուգանք, այդ գումարը վճարվում է հանցանքի «պատվիրատուի» կողմից: Այսպիսով, իրավախախտման հեղինակը որևէ անձնական պատասխանատվության իրականում չի ենթարկվում», - ներկայացվում է նախագծի հիմնավորման մեջ։Էդմոն Մարուքյանի համոզմամբ՝ պատժի խստացումը «չի կարող ազդեցություն չունենալ խնդրո առարկա հոդվածով հանցագործությունների նախականխման գործում»: Համաձայնեք, որ սա հայաստանյան ընտրական գործընթացների հայտնի միջավայրին բնորոշ, պահանջված նախագիծ է։ Ենթադրվում է, որ իշխանություններոը, որոնք մշտապես հայտարարում են ազատ, արդար, առանց կեղծիքների ընտրությունների անցկացման իրենց լուսավոր ցանկությունների մասին, պետք է երկու ձեռքով ողջունեն պատգամավորի առաջարկը եւ նախագծին օրենքի ուժ տան։ Սակայն, կառավարությունում մի շարք պաշտոնյաների՝ նախագծի վերաբերյալ տեսակետներից պարզ է դարձել, որ այնքան էլ ոգեւորված չեն ու կարծես թե հայտնի է, թե ինչ ճալատագիր է նախագծին սպասվում։ Արդարադատության նախարար Արփինե Հովհաննիսյանը հայտնել է, որ ինքը բացասական եզրակացություն է տվել նախագծին՝ առաջարկելով հարցի վերբերյալ քննարկում կազմակերպել: Նա ասել է, որ ուսումնասիրվել է միջազգային փորձը, և օրինակ` Գերմանիայում ու Շվեյցարիայում նույնպես ընտրակեղծարարության համար սահմանված են տուգանքներ:Էկոնոմիկայի նախարար Արծվիկ Մինասյանն էլ է պաշտպանել իշխանության տեսակետը, որ պետք է խստացնել տուգանքի չափը, այլ ոչ թե ազատազրկում սահմանել: Կառավարության աշխատակազմի ղեկավար-նախարար Դավիթ Հարությունյանն էլ իր հերթին է հավելել, որ պետք է այդ հարցը վստահել դատարանին:«Շատ արհեստական եւ կոշտ է, սրանով մենք իսպառ վերացնում ենք դատարանի դերակատարումը: Գյուղերում լինում են դեպքեր, երբ ամուսինը կնոջ անձնագրով գալիս է քվերակման»,-բացահայտել է Դավիթ Հարությունյանը: Վարչապետ Հովիկ Աբրահամյանը լսելով նախարարների տեսակետները՝ ասել է, որ ինքն ուսումնասիրել է այս խնդիրը եւ գիտի, որ Գերմանիայում եւ Շվեյցարիայում գործում է ե՛ւ տուգանքը, ե՛ւ ազատազրկումը: «Ես կարծում եմ, որ ճիշտ կլինի մենք տանք համաձայնություն, ԱԺ-ն կորոշի: Իրավական առումով ես էլ եմ համարում, որ ճիշտ չի»,- կարծիք է հայտնել վարչապետը ։ Ինչ է ստացվում, ստացվում է, որ կառավարության ներկայացուցիչները դեմ են այս առաջարկին, սակայն իրենց վրա ընտրակեղծարարությունների հովանավորչության պատասխանատվություն չեն վերցնում եւ գնդակն ուղարկում են այլ դաշտ։ Որովհետեւ ընդդիմադիրները մերժման դեպքում կարող էին բողոքի նոտա բարձրացնել գործադիրի ղեկավարի դեմ, մինչդեռ ԱԺ-ում օրենքի նախագծի մերժումից հետո այդ պատասխանատվությունը կընկնի բոլորի վրա ։ Հ.Գ.-Մյուս կողմից արտաքուստ անհասկանալի է պարոն Մարուքյանի վայրիվերումները, նա մի ֆրոնտով համագործակցում է իշխանությունների հետ եւ ունի նրանց հովանավորչությունը, մասնավորապես Բարսեղ Բեգլարյանի,մյուս կողմից՝ հանդես է գալիս իշխանությանն անհաճո ձեռնարկներով, հավանաբար ընդդիմադիր իմիջ վաստակելու խնդիր կա։ Անի Սահակյան