Մարտահրավեր Մհեր Սեդրակյանից
ԱԺ ՀՀԿ խմբակցության անդամ Մհեր Սեդրակյանի՝ Թոխմախի Մհերի անունը կրկին հայտնվել է մամուլի էջերում, որքան էլ զարմանալի է, բայց այս անգամ՝ <<լավով>>: Օրերս պետական գրանցում է ստացել «Սեդրակյան» բարեգործական հիմնադրամը, որը հիմնադրել է Սեդրակյան ընտանիքը: Այս մասին տեղեկացրել է ոչ թե Թոխմախի Մհերը, այլ որդին, Կադաստրի կոմիտեի պետի տեղակալ Դավիթ Սեդրակյանը: Պետական գրանցում ստացած հիմնադրամի նպատակը լինելու է բուհական կրթության ձգտող երիտասարդների խթանումը, խրախուսումը, ուսման վարձի վճարման աջակցությունը: Հիմնադրամին կարող են դիմել Երևանի Էրեբունի եւ Նուբարաշեն վարչական շրջանների իններորդ դասարանի աշակերտները, որոնցից խրախուսման արժանացողները կընտրվեն մրցութային կարգով: Հասկանալի է, որ կրտսեր Սեդրակյանը հազիվ թե կարողանար հիմնադրամ ստեղծել՝ նկատի ունենալով իր աշխատավարձի չափը, որն այնքան չէ, որից կարելի է մի բան էլ բարեգործությանն ուղղել: Ուստի հիմնադրամը Թոխմախի Մհերի գումարներով է, որի անվան հետ բազմաթիվ բիզնեսներ են կապվում: Սակայն, հիմնադրամը ներկայացնում է Դավիթ Սեդրակյանը՝ հանրությանը , ըստ էության, ներկայանալով բավական դրական իմիջով, քան հայրիկն է: Իսկ հայրիկի մասին թերեւս հիշեցնելու կարիք չկա, նա պարբերաբար մամուլի ուշադրության կենտրոնում է հայտնվել իր տխրահռչակ վարքով: Հենց այս պահին էլ ԱԺ էթիկայի հանձնաժողովը քննում է պատգամավորի վարքը, նա շաբաթներ առաջ ԱԺ լրագրողների խմբին <<նախիր>> էր անվանել, իսկ հետո, երբ լրագրողները բացատրություններ էին պահանջել, նաեւ հայհոյել էր: Ավելի վաղ էլ նա լրագրողներից մեկին սպառնացել էր կոտրել ծնոտը; Իսկ, ահա, Սեդրակյան անվան վերջին հայտնությունը շրջադարձային էր: Հասկանալի է, որ նման համարձակ մարտահրավերները հենց այնպես չեն արվում: Տևական ժամանակ է, որ Մհեր Սեդրակյանի անունը շոշափվում է նաեւ ներքաղաքական համատեքստում: Մասնավորապես, ըստ մամուլի հրապարակումների, նա ունի որդուն Երեւանի քաղաքապետի թեկնածու դարձնելու մտադրություն եւ այդ հողի վրա անգամ հակասության մեջ է վարչապետ Հովիկ Աբրահամյանի հետ, ով նույնպիսի պլաններ ունի: Բայց մինչ թեկնածու հռչակելը Թոխմախի Մհերը դեռ պիտի ապացուցի, որ իր որդին արժանի թեկնածու է, որին կարելի է նաեւ նման բարձր պաշտոն: Իսկ այս հիմնադրամը իսկական միջոց է, որով կարելի է հանրությանը երևալ հրեշտակային կերպարով , օգնության ձեռք մեկնել մի քանի ուսանողների ու դառնալ պոտենցիալ հավակնորդ ցանկացած պաշտոնի: Իհարկե, չի բացառվում, որ Երևանի քաղաքապետի պաշտոնը չստացվի, բայց հաստատ այլ բան Սեդրակյանները կհաջողացնեն: Մամուլը վերջին ժամանակներում հաճախ է գրում, որ Սերժ Սարգսյանի պլաններում կա քաղաքական սերնդափոխությունը: Այս համատեքստում նա առաջարկելու է խորհրդարանի մականունավորնեին իրենց փոխարեն զավակներին, կամ ազգականներին խորհրդարան ուղարկել: Առաջին ծիծեռնակը, փաստորեն, Սեդրակյանն է, անկասկած է, որ նրան կհետեւեն ուրիշները ու առաջիկա տարում Հայաստանը կշողշողա բարեգործությունների լույսի ներքո: Անի Սահակյան