Բնակարանը և ավտոտնակը չկան, իսկ դրամական միջոցներն ավելացել են

«Փաստ» թերթը գրում է. «Ճանապարհային ոստիկանության հաշվառման-քննական եւ տրանսպորտային միջոցների տեխնիկական փորձաքննության բաժնի պետ Սպարտակ Սեփյանը Բարձրաստիճան պաշտոնատար անձանց էթիկայի հանձնաժողովին է ներկայացրել 2018թ. տարեկան հայտարարագիրը: Հանձնաժողովի պաշտոնական կայքում հրապարակված հայտարարագրից տեղեկանում ենք, որ նա ներկայացրել է տվյալներ՝ տարեկան կտրվածքով ունեցած եկամտի ու դրամական միջոցների վերաբերյալ: 2018թ. սկզբում նրա դրամական միջոցները կազմել են 4 500 000 դրամ եւ 5500 դոլար: 2018թ. վերջում 4 500 000 դրամ միջոցը դարձել է 6 300 000 դրամ: 5500  դոլարը հարկային տարվա վերջում նույնն է մնացել: Նախորդ տարվա ընթացքում հայտարարատու անձի եկամուտը գոյացել է աշխատավարձից՝ կազմելով 5 511 447 դրամ: Նշենք, որ Սպարտակ Սեփյանը պաշտոնը ստանձնել է 2018թ. հուլիսին: Ըստ պաշտոնը ստանձնելու հայտարարագրի՝ նա այդ ժամանակ ունեցել է նաեւ բնակարան եւ ավտոտնակ: Իսկ արդեն տարեկան հայտարարագրում անշարժ գույքի վերաբերյալ տվյալներ չկան: Սպարտակ Սեփյանը շարժական գույք եւս չի հայտարարագրել»: Ամբողջությամբ կարող եք կարդալ թերթի այսօրվա համարում: