Զրույց Դավոսում, ապա ուղիղ՝ Մոսկվա. Փաշինյան-Ալիև հանդիպման խորքերը

Հայաստանի վարչապետ Նիկոլ Փաշինյանը Դավոսում ոչ պաշտոնական հանդիպում է ունեցել Ադրբեջանի նախագահ Իլհամ Ալիևի հետ։ «Մտքեր փոխանակեցինք բանակցային գործընթացի ընթացիկ իրավիճակի և հետագա քննարկումների մասին: Հանդիպումը տևեց մոտ ժամուկես», ֆեյսբուքում հայտնեց Փաշինյանը։ Ուշագրավ մի հանգամանք ևս, մինչ այդ հանդիպումն արդեն Ալիևն «օգտակար» է անվանել Փաշինյանի հետ տեղի ունեցած զրույցները: ԱՊՀ գագաթնաժողովներին Հայաստանի ղեկավարության հետ հանդիպումներն օգտակար էին կողմերի դիրքորոշումների որոշման ու Ղարաբաղի հարցով բանակցությունների ակտիվացման տեսանկյունից, Դավոսի համաշխարհային տնտեսական ֆորումի շրջանակներում Ria.ru-ին ասել է Ադրբեջանի նախագահ Իլհամ Ալիևը։ «Ես երբեք չեմ խուսափել հայկական կողմի հետ որևէ մակարդակով հանդիպումներից, որովհետև մենք շահագրգռված ենք հակամարտությունը հնարավորինս շուտ կարգավորելու մեջ», - ասել է նա։ Ալիևը նշել է, որ Հայաստանի ու Ադրբեջանի ղեկավարության միջև դեռևս տեղի չեն ունեցել լիարժեք ձևաչափով բանակցություններ, սակայն արդեն եղել են մի քանի «օգտակար զրույցներ»։ «Որպես այդպիսին հանդիպում չի եղել։ Մենք ունեցել ենք 2 զրույց։ Դուշանբեում՝ ԱՊՀ գագաթնաժողովի ժամանակ, և Սանկտ-Պետերբուրգում՝ ԱՊՀ ոչ ֆորմալ գագաթնաժողովի ժամանակ։ Դրանք չի կարելի անվանել լիարժեք հանդիպում, սակայն օգտակար զրույցներ էին, որոնք ուղղված էին կողմերի դիրքորոշումների որոշմանն ու բանակցային գործընթացին նոր ազդակ հաղորդելուն, որն այժմ ակտիվացել է», - ասել է Իլհամ Ալիևը։ Ահա, ևս մի ոչ պաշտոնական հանդիպում Փաշինյանի ու Ալիևի միջև: Կողմերը, այժմ էլ Ալիևը փաստում են, թե այդ հանդիպումները պարզապես զրույցներ են, բանակցություններ չեն: Բայց ինչ են մի քանի ժամ քննարկում արտգործնախարարները, և թեկուզ կարճատև զրույցներում՝ Փաշինյանն ու Ալիևը... Ավելին՝ համանախագահների հայտարարություններից տպավորություն չի ստեղծվում, որ այդ հանդիպումներն ընդամենը զրույցներ են: Միջնորդները կոնկրետ հորդորում են կողմերին՝ իրենց հասարակություններին խաղաղության նախապատրաստել, իսկ դա լուրջ հորդոր է, դա արվում է, երբ առնվազն կա հույս, կա նախադրյալ, որ կողմերը կարող են հասնել համաձայնության: Փաշինյանը Դավոսից հետո մեկնելու է Մոսկվա՝ հունվարի 24-ին: Նա ըստ վարչապետի մամուլի ծառայության, այցելելու է Եվրասիական տնտեսական հանձնաժողովի Մոսկվայի կենտրոնակայան, որտեղ հանդես կգա ելույթով՝ Եվրասիական տնտեսական միության բարձրագույն մարմիններում Հայաստանի նախագահության առաջնահերթությունների վերաբերյալ։ Նախատեսվա՞ծ է Փաշինյան-Պուտին առանձին հանդիպում՝ առայժմ պաշտոնապես չի հայտարարվել, սակայն փաստը, որ Փաշինյանն Ալիևի հետ հանդիպումից հետո մեկնում է Ռուսաստան, արդեն նշանակում է, որ չի բացառվում ղարաբաղյան թեմայի շուրջ քննարկումները Փաշինյան-Ալիև հերթական զրույցի առնչությամբ: Թամար Բագրատունի