Այս բառից զզվում եմ. Արթուր Մեսչյան

Երևանի գլխավոր ճարտարապետ Արթուր Մեսչյանը լրագրողների հետ հանդիպման ընթացքում անդրադառնալով գերատեսչություններում աղմուկ բարձրացրած պարգևավճարներին՝ խոստովանեց, որ տեղյակ չէ, թե քաղաքապետարանից իր հաշվեհամարին որքան գումար են փոխանցել, սակայն լավ գիտի, թե տվյալ գումարն ինչ է արել։ «Թե ինչ եմ արել այդ գումարը՝ ձեզ չեմ ասի, այսինքն, թե ինչով եմ զբաղվում իմ կյանքում, չնայած այս բառից զզվում եմ՝ բարեգործություն, այս մասին չեմ խոսում։ Ինչպես ասում են, այդ գումարն ինչպես եկավ, այնպես էլ գնաց։ Երբևէ չեմ ասել, բայց պետք է ասեմ՝ այդ գումարը, որը փոխանցել էին իմ հաշվեհամարին, չի նշանակում, որ իմ մեկ սենյականոց բնակարանից տեղափոխվեց չորս սենյականոց բնակարան, 1994 թվականի մեքենան դարձավ «Մերսեդես բենց» մակնիշի, և այլն։ Ես ասում եմ, որ Երևանում պետք է մաքսիմում քիչ տեղ զբաղեցնեմ՝ մեքենայով, բնակարանով և ամեն ինչով։ Այսինքն՝ գիտեմ՝ ինչ եմ արել այդ գումարը և գիշերը հանգիստ քնում եմ։ Որպես ՀՀ «թասիբ» ունեցող քաղաքացի՝ միայն մի բան կարող եմ ասել, որ այդ գումարը, որը ստացել եմ, ինձ համար որևէ բարոյական բեռ չեղավ»,- ասաց Մեսչյանը։ Ըստ նրա՝ հեղափոխությունից հետո կատարվել է ու կատարվում է մեծ ծավալի աշխատանք, ու աշխատակիցները մինչև ուշ գիշեր աշխատում են։ «Հիմա եթե հնարավորություն կա 13-րդ աշխատավարձի պես (չգիտեմ անունը ինչ է՝ 13, 14, 16, դա նշանակություն չունի) Նոր տարվա շեմին էտ մարդկանց իսկապես նվիրյալ աշխատանքի համար, քանի որ աշխատավարձերը բավականին համեստ են, էտ մարդիկ ստանան որոշակի գումար, դրա մեջ ինչ-որ վատ բան կա՞։ Ես կարծում եմ, կներեք, որ ոչ», – ասաց Մեսչյանը։