«Արամի 23-ի հարցը փակված է». Երևանի գլխավոր ճարտարապետ

«Հայաստանի փոքրիկ երգիչներ» երգչախմբի շենքի փլուզված պատը վերականգնելու համար ստորագրվելու է եռակողմ պայմանագիր: Լրագրողների հետ զրույցում այս մասին ասաց Երևանի գլխավոր ճարտարապետ Արթուր Մեսչյանը: «Արամի 23-ի հարցը լուծվել է, այսօր ՀՀ մշակույթի նախարարությունը, Տիգրան Հեքեքյանը և այդ տարածքն իրացնող ընկերությունը ստորագրելու են պայմանագիր։ Ըստ պայմանագրի՝ կառուցապատող ընկերությունը 14 մլն դոլար է տալիս իտալացի ճարտարապետ Լուչիո Պեցին, որը պետք է իրականացնի Արամի 23-ի վերականգնման նախագիծը»,- շեշտեց Մեսչյանը և հավելեց, որ «Հայաստանի փոքրիկ երգիչներ»-ի շենքի հարցը, որը գտնվում է Արամի, 23 հասցեում, արդեն փակված է: Նրա խոսքով՝ Երևանի քաղաքապետարանն այդ հարցին որևէ առնչություն չունի: «Մենք պարզապես այս ամենին զորավիգ ենք կանգնում, ինչը, իհարկե, բարի կամքի արտահայտություն է։ Կոնկրետ այս դեպքում հուշարձանի սեփականատերը և կառուցապատողն իրենց մեջ պետք է հարցը լուծեն։ Այնպես որ, Արամի 23-ի հարցը համարում եմ փակված։ Մի փոքր զարմանք կա, քանի որ աղմուկը Արամի 23-ի հետ կապված՝ մի քիչ ավելի շատ էր, քան պետք էր։ Չպետք է մոռանանք, որ Երևանում միայն Արամի 23-ի պատը չի քանդվել, ունեցել ենք բավականին դեպքեր, նույնիսկ մարդկային զոհերով, որոնց մասին այդքան աղմուկ չի եղել»,- ասաց  Մեսչյանը