Կոնսենսուս Ղարաբաղի հարցով. Ինչ են հուշում Մոսկվայի, Բրյուսելի ու Վաշինգտոնի ազդակները

Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի, ինչպես նաև երկու երկրների արտգործնախարարների միջև՝ Եվրոպայի անվտանգության և համագործակցության կազմակերպության (ԵԱՀԿ) Մինսկի խմբի համանախագահների հովանու ներքո տեղի ունեցած հանդիպումները դրական ազդակ են հաղորդում ղարաբաղյան հակամարտության խաղաղ կարգավորմանը, այս մասին ասվում է Եվրամիության դիվանագիտության ղեկավարի խոսնակ Մայա Կոսյանչիչի հայտարարության մեջ: «Եվրամիությունն անհամբերությամբ սպասում է բանակցությունների արդյունքների՝ ներառյալ երկրների արտգործնախարարների՝ ժողովուրդներին խաղաղության նախապատրաստելու համար կոնկրետ միջոցներ ձեռնարկելու անհրաժեշտության մասին վերջերս ձեռք բերված համաձայնության ամբողջական իրականացմանը, ինչպես նաև բանակցություններին նոր լիցք հաղորդելուն ուղղված քայլերին»,- ասված է Եվրամիության դիվանագիտության ղեկավարի խոսնակի հայտարարության մեջ: Նշվում է նաև, որ Եվրամիությունը շարունակում է լիովին աջակցել ԵԱՀԿ Մինսկի խմբի համանախագահների, ինչպես նաև քաղաքացիական հասարակության շրջանում վստահության ամրապնդմանն ուղղված ջանքերին: Հայտարարության համաձայն՝ բոլոր կողմերը կշահեն երկարաժամկետ խաղաղության հաստատումից, ինչը կօգնի Հարավային Կովկասի տարածաշրջանին գործի դնել իր ամբողջ ներուժը: Այսպես` Եվրամիությունը դրական ազդակներ է տեսնում ղարաբաղյան խնդրի շուրջ բանակցություններում, և ակնկալում է, որ կողմերը լիարժեքորեն կիրագործեն վերջին հանդիպումներում ձեռք բերված պայմանավորվածությունները: Փաստացի, ԵՄ արտաքին հարաբերությունների գծով հանձնակատար Ֆեդերիկա Մոգերինն էլ միացավ ՄԱԿ-ի գլխավոր քարտուղարին: Ազդակը շատ կոնկրետ է՝ «ժողովուրդներին խաղաղության նախապատրաստելու» համար կոնկրետ միջոցներ ձեռնարկելու անհրաժեշտություն, վերջերս ձեռք բերված համաձայնության ամբողջական իրականացում.. Ասել կուզեն՝ Փաշինյանից և Ալիևից կոնկրետ քայլեր են ակնկալվում: Ուշագրավ է, որ կողմերի միջև վստահությունն ամրապնդող միջոցառումների մասին հիշատակելով միջազգային հանրությունը, ինչպես և ԵԱՀԿ Մինսկի խումը՝ չեն էլ հիշատակում վստահության մեխանիզմների ներդրման մասին, ըստ երևույթին, բավարարված մնալով Հայաստանից և Ադրբեջանից հնչող Դուշանբեի «վերելակային» պայմանավորվածությունների հաջողություններով: Եթե հաշվի առնենք հանգամանքը, որ վերջին շաբաթներին նաև Մոսկվան ՌԴ արտգործնախարար Լավրովի մակարդակով ազդարարեց, որ հայկական կողմից ակնկալում է որոշակի քայլեր: ԵԱՀԿ Մինսկի խումբը համանախագահող Ռուսաստանը, այժմ էլ ԵՄ-ն, կարելի է ասել, որոշակի կոնսենսուս ունեն ԼՂ հարցում: Մնում է ավելի հստակ ազդակներ ստանալ Վաշինգտոնից: Թերևս, նման մի ազդակ էլ կարելի է համարել Միացյալ Նահանգների նախագահ Դոնալդ Թրամփը շնորհավորական ուղերձը՝ Նիկոլ Փաշինյանին, որում նա շնորհավորում էր ՀՀ վարչապետի պաշտոնում նշանակվելու կապակցությամբ: «Միացյալ Նահանգներն աջակցում են բարգավաճ, ժողովրդավարական և հարևանների հետ խաղաղ գոյակցող Հայաստանին: Միասին մենք կարող ենք առաջընթաց արձանագրել մեր երկրների միջև առևտրատնտեսական կապերի խորացման, համաշխարհային անվտանգության ամրապնդման և կոռուպցիայի դեմ պայքարի գործում: Լեռնային Ղարաբաղի հակամարտության խաղաղ կարգավորումը կնպաստի այդ ջանքերին», ասվում էր Թրամփի ուղերձում: Թամար Բագրատունի