Գարիկ Սարգսյանը դպրոցի տնօրեն է ազատել․ մարզպետը տեղյակ չէ՞ դպրոցականների արձակուրդից

NEWS.am-ի տեղեկություններով՝ Արարատի մարզպետ Գարիկ Սարգսյանի կարգադրությամբ օրերս աշխատանքից ազատվել է Բյուրավանի միջնակարգ դպրոցի տնօրեն Նվարդ Մելիքյանը։ Տնօրենի ազատման պատճառ են դարձել Բյուրավանի միջնակարգ դպրոցում հունվարի 8-ին մարզպետի կատարված շրջայցի արդյունքում հայտնաբերված թերությունները։ Կայքի հետ զրույցում Նվարդ Մելիքյանը նշեց, որ մարզպետը շրջայցի ընթացքում արձանագրել է, որ դպրոցում շատ բացականեր կան, մինչդեռ նրա պնդմամբ՝ դպրոցից բացակայել է 38 աշակերտ, որոնք վարակված են եղել գրիպով և ջրծաղիկով, իսկ տարրական դասարանների աշակերտները եղել են արձակուրդում։ «Պարզել են, որ 1-ից 4-րդ դասարանի աշակերտները տեղում չեն եղել, բայց երևի մարզպետը տեղյակ չի եղել, որ տարրական դասարանի աշակարտները մինչև հունվարի 21–ը արձակուրդում են եղել։ Բացակա աշակերտները գրիպով և ջրծաղիկով հիվանդ են եղել, բացի այդ՝ արձակուրդից հետո առաջին օրն է եղել, 4-րդ դասաժամին 10-րդ դասարանում եղել է 8 աշակերտ, ուսուցիչները դասարաններում զբաղվել են բացակաների հարցերով»,- պատմեց նա։ Մարզպետը դժգոհել է նաև դպրոցի ցածր ջերմաստիճանից, մինչդեռ ըստ Մելիքյանի՝ դպրոցում ջեռուցման սալիկներ են տեղադրած, և դասարաններում 18-20 աստիճան ջերմությունն ապահովված է։ Աշխատանքից ազատված տնօրենը հայտնեց, որ հաջորդ օրն անձամբ ներկայացել է մարզպետին և զեկուցել, թե ինչ աշխատանքներ է կատարել թերությունները շտկելու համար։ Տնօրենը պատմեց, որ ամիսներ առաջ էլ իր դեմ մարզպետարան բողոք էր ներկայացրել աշխատանքից ազատված ֆիզկուլտուրայի ուսուցչուհին։ «Այդ ուսուցչուհին ազատվել էր աշխատանքից՝ թոշակային տարիքի լրանալու կապակցությամբ։ Նա անհիմն բողոքներ էր ներկայացրել իմ հասցեին, որոնք սակայն հետագայում հերքվել են»,– ասաց նա։ Մելիքյանի կարծիքով՝ իրեն աշխատանքից ազատելը հնարավոր է պայմանավորված լինի նաև մարզի կրթության բաժնի պետ Ալբերտ Մկրտչյանի գործոնով։