Որտեղ է հիմա Նարեկ Սարգսյանը և ինչու դեռ չի տեղափոխվել Հայաստան

Հայաստանի երրորդ նախագահ Սերժ Սարգսյանի եղբոր որդու՝ Նարեկ Սարգսյանին Հայաստան արտահանձնելու վեջնաժամկետը լրացել է երեկ՝ հունվարի 17-ին։ Analitik.am-ը կապ հաստատեց Գլխավոր դատախազության հանրային կապերի բաժնի պետ Արևիկ Խաչատրյանի հետ, ով ասաց, որ Նարեկ Սարգսյանից տեղեկություններ չունեն, ինչպես նաև հավելեց, որ նրան դեռ Հայաստան չեն տեղափոխել : Հաշվի առնելով այն, որ այլ երկրի պահանջով ձերբակալված անձը նախնական կալանքի տակ կարող է մնալ առավելագույնը 40 օր, իսկ այդ ժամկետն արդեն լրացել է երեկ՝ հունվարի 17-ին, Նարեկ Սարգսյանը ներկա պահին կարող է գտնվել ազատության մեջ։ Օրենսդրական առումով պարզաբանում ստանալու համար կայքը զրուցեց իրավաբան Լիպարիտ Սիմոնյանի հետ, ով մեզ հայտնեց, որ անկախ ներկայացված դիմումից, փաստաթղթերի հետ կապված հարցերի դեպքում, միայն դատարանի որոշմամբ կարող է 40 օր սահմանված ժամկետը երկարացվել: «Արտահանձնումը միայն փաստաթղթերով չէ պայմանավորված, դատարանը նույնպես պետք է որոշում կայացնի: Դատախազությունը պետք է իր որոշումը կայացնի, դա կարող է բողոքարկվել և ներպետական դատական ատյաններով անցնել: Մինչև բողոքարկման ատյանները չսպառվի, արտահանձնումը չի կատարվի: Այդ որոշումը ուժի մեջ մտնելուց հետո նոր միայն տեղեկացվում է, որ ձեր հանձման վերաբերյալ հարցումն ընդունված և կայացված է ու դրանից հետո արդեն տեխնիկական խնդիրներն է քննարկվում, որից հետո նոր տեղափոխվում է անձը: Չբացառենք այն, որ բավարար ապացույցներ չներկայացնելու դեպքում, դատարանը կամ դատախազությունը կարող է նաև մերժել և կալանավորված անձն այդ դեպքում կարող է հայտնվել ազատության մեջ»: Հիշեցնենք, որ դեկտեմբերի 6-ին Պրահա-5 թաղամասում գտնվող բնակարաններից մեկում Պրահայի տարածքային ոստիկանության քրեական հետախուզման բաժնի աշխատակիցները ձերբակալել էին 37-ամյա Նարեկ Սարգսյանին, ով գտնվում էր միջազգային հետախուզման մեջ: Նարեկ Սարգսյանին մեղադրանք են առաջադրել 2018-ի ամռանը, երբ վերջինիս՝ Երևանի կենտրոնում գտնվող բնակարանում ապօրինի զենք ու թմրանյութեր էին հայտնաբերել: Նշենք նաև, որ հանձնման մասին եվրոպական կոնվենցիայի համաձայն` այլ երկրի պահանջով ձերբակալված անձը նախնական կալանքի տակ կարող է մնալ առավելագույնը 40 օր, և եթե մինչև այդ հայցվոր կողմը արտահանձնման դիմում չներկայացնի, տեղի իշխանությունները կարող են նրան ազատ արձակել: