Կառավարությունը մտափոխվել է՞
Կառավարությունը չի ցանկանում հապշտապ նախագիծ բերել։ Այսօր ԱԺ-ում լրագրողների հետ զրույցում նման տեսակետ հայտնեց «Իմ քայլը» խմբակցության պատգամավոր Վահագն Հովակիմյանը՝ անդրադառնալով հարցին, թե ինչու կառավարությունը մինչ օրս ԱԺ չի ուղարկել «Կառավարության կառուցվածքի մասին» օրենքի նախագիծը: Նրա խոսքով՝ երբ նախագծի ամբողջական փաթեթը պատրաստ կլինի, կներկայացնեն խորհրդարանի քննարկմանը: «Բայց ԱԺ կանոնակարգով հստակ սահմանվում է, որ առաջին 5 հարցը պետք է ամենօրյա ռեժիմով քննարկվի, և խորհրդարանը դադար է վերցնում հինգերորդ հարցի, այսինքն՝ մշտական հանձնաժողովների հարցի քննարկումից հետո: Դրանից հետո խորհրդարանը կարող է դադար վերցնել, հետո անցնել մյուս երկու հարցերին՝ կառուցվածքի հնարավոր փոփոխության հարցին և կառավարության ծրագրին»,- պարզաբանեց նա։ Միևնույն ժամանակ պատգամավորը նշեց՝ չի կարծում, որ Կառավարությունը մտափոխվել է, քանի որ օպտիմալացման գաղափարը նաև «Իմ քայլը» դաշինքի նախընտրական ծրագրի հիմքում է եղել:
Հետևեք մեզ Viber-ում
