«Տիկին Մակունց, մենք նրա համար ենք, որ դուք չկարողանաք վերահսկել...». Մարուքյանի կոշտ պատասպանը «Իմ քայլը» պատգամավորներին

ԱԺ փոխնախագահ, «Իմ քայլը» խմբակցության անդամ Ալեն Սիմոնյանն այսօր արձագանքել էր «Լուսավոր Հայաստան» խմբակցության ղեկավար Էդմոն Մարուքյանի՝ մարդու իրավունքների վերաբերյալ այսօրվա ելույթին, որից հետո Մարուքյանի պատասխանը չուշացավ: «Ես չէի պատկերացնում, որ մարդու իրավունքների վերաբերյալ  իմ ելույթին կպատասխանի «Իմ քայլը» խմբակցության ղեկավարը, հետո պատգամավորը, հետո Ազգային ժողովի փոխնախագահը՝ արտահերթ ելույթով, լավ պրծանք, որ այդքանով սահմանափակվեցինք։ Նախ՝ պետք է ասեմ, որ քաղաքական մեծամասնությունը պետք է հասկանա, որ արդեն, այլևս, ահագին ժամանակ է, ոնց բացատրեմ, երկար վախտ ա իշխանություն եք։ Հիմա, երբ Ալեն Սիմոնյանն ասում է, որ այդ մասին իրե՞նց ենք ասում, ապա պետք է ասեմ, որ այո՛ հենց ձեզ պետք է ասենք։ Ես հասկանում եմ, որ մարդիկ տարբեր ճանապարհներ են անցել՝ ընդդիմություն են եղել, լրագրող և ակտիվիստ են եղել իշխանություն են դարձել, բայց կարող է ամբողջական զգացողություն չունեն, որ իշխանություն են և պատասխանատվություն չեն կրում, երբ, օրինակ, մեկը փնթի գործ է քննել»,- ասաց ԼՀԿ խմբակցության ղեկավարը: Այնուհետև շարունակեց «Փոխանակ շնորհակալ լինեք, ասում եք՝ մի արեք: Ի՞նչ չանենք, չաշխատե՞նք, չբարձրաձայնե՞նք, միայն ձեզ գովա՞նք... Կամ, տիկին Մակունց, ասում եք՝ մենք մամուլին չենք վերահսկում, կներեք, դուք ի՞նչ լծակ ունեք լրատվամիջոցներին վերահսկելու, ավելին ասեմ, դուք չեք կարող վերահսկել: Մենք չենք վերահսկում, այսինքն՝ կարանք վերահսկենք, բայց չենք անում, լավություն ենք անում, հա՞... Տիկին Մակունց, մենք նրա համար ենք, որ դուք չկարողանաք վերահսկել...»,- շեշտեց Մարուքյանը: