Ինձ մտահոգում է, որ դուք նսեմացնում և ցածրացնում եք Ազգային ժողովի դերը. Գորգիսյանը՝ Հայրապետյանին

Ազգայի ժողովում Գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահի հարցի քննարկման ժամանակ «Լուսավոր Հայաստան» խմբակցության պատգամավոր Գևորգ Գորգիսյանը հանձնաժողովի թեկնածու «Իմ քայլից» Մխիթար Հայրապետյանին հետևյալ հարցն ուղղեց. «Ձեր պատասխաններից ելնելով՝ Դուք անընդհատ հղում եք անում կառավարության վրա, բայց շատ կարևոր հանձնաժողով եք պատրաստվում նախագահել և այստեղ շատ կարևոր է լինելու նաև Ձեր մոտեցումը, որովհետև երբ կառավարությունը բերի մի հայեցակարգ կրթության, գիտության, մշակույթի կարևորագույն ոլորտների հետ կապված՝ նաև Ազգային ժողովը պետք է հստակ դիրքորոշում ունենա այդ հարցերի վերաբերյալ և ինչու չէ՝ նախաձեռնի այդ ամենի գեներացիան և ինձ մտահոգում է, որ դուք այդ ամենը թողնում եք կառավարության վրա՝ կրկին նսեմացնելով և ցածրացնելով Ազգային ժողովի դերը: Այս հարցին, խնդրում եմ՝ անդրադարձեք»: Հարցին ի պատասխան Հայրապետյանը նշեց. «Ես ափսոսում եմ, որ Ձեզ մոտ իմ խոսքից նման տպավորություն է ստեղծվել, որովհետև ես առաջինն էի 7-րդ գումարման Ազգային ժողովում, ով խոսեց պառլամենտարիզմի՝ որպես ինստիտուտի դերի բարձրացման  և նախկինում առկա այդ գահավիժման դեմն առնելու և որպես գործադիրի վերահսկող ֆունկցիաների լիակատար իրականացման  և ես անգամ այս ամբիոնից սթափեցնողի դեր կատարեցի»,-ասաց Հայրապետյանը: