Երբ հասկանան «դուխով» չեն կերակրվում, ճանապարհ կփակեն ու կպահանջեն շահագործել «Ամուլսարը»
Նոր Հայաստանի այցեքարտը համարվող ճանապարհ փակելու մոլուցքը տևական ժամանակ պարուրել էր Ամուլսարի շահագործմանը դեմ ջերմուկցիներին: Օրեր ու ամիսներ շարունակ փակելով դեպի հանքավայր տանող ճանապարհը` նրանք վերջնականապես կարողացան հասնել նրան, որ պետությունը միջամտի խնդրին ու փակ պահի դեպի Ամուլսար տանող բոլոր ճանապարհները: ՀՀ վարչապետ Նիկոլ Փաշինյանի երեկվա «լայվով» շփումը քաղաքացիների հետ, մեղմ ասած, տարօրինակ էր: Վերջինս ընդդեմ Մանվել Գրիգորյանի ցույցերը քննադատելուց զատ ասաց նաև, թե քաղաքացիները ճանապարհ փակելու իրավունք ու իրավական համակարգի աշխատանքներին խոչընդոտելու իրավունք չունեն` մոռանալով, որ տնտեսություն կառավարելու հարցերում նույնպես հասարակ քաղաքցիներ չեն ընդգրկվում: Լավ կլիներ, վարչապետը նման մի «լայվ» էլ Ամուլսարի մասով աներ, ու ժողովրդին հասկացներ, որ այն չարիքների չարիքը չէ: Ամուլսարի հանքավայրը, կարող էր ասել Փաշինյանը, կենսական նշանակություն կարող է ունենալ բոլորի համար, ու ոչ ոք իրավունք չունի խոչընդոտել ներդրողի իրավունքները: Ես, օրինակ, չեմ բացառում, որ որոշ ժամանակ անց ջերմուկցիները կարող են կրկին ճանապարհ փակել, բայց այս անգամ արդեն հանքի շահագործման պահանջով: Գործող իշխանությունների վարած քաղաքականության հետևանքով, երբ մարդիկ, հնարավոր է, օրվա հացի խնդիր ունենան, հասկանան, որ «դուխով» չեն կերակրվում, նոր կառավարիչներից այժմ էլ հանքավայրի բացումը պահանջեն, ինչը հազարավոր աշխատատեղեր կարող է ստեղծել: Հիշեցնենք, որ այդպիսի նախադեպ արդեն եղել է Թեղուտում, որի աշխատակիցները իշխանափոխությունից նման պահանջ դրեցին Փաշինյանի ու նրա կառավարության առջև: Թեղուտցիները մինչ օրս էլ պարբերաբար ճանապահ են փակում ու պահանջում վերաշահագործարկել հանքավայրը: Հրանտ Ենոքյանի Facebook-ի էջից:
Հետևեք մեզ Viber-ում
