Երեւանի ավագանին արտոնություն է սահմանել

Երեւան քաղաքի ավագանին այսօր որոշել է արտոնություններ սահմանել մայրաքաղաքում գործունեություն իրականացնող այն տնտեսվարող սուբյեկտների համար, որոնց գործունեության բոլոր տեսակների մասով 2018 թվականի հարկային տարվա ընթացքում իրացման շրջանառությունը չի գերազանցել 115 միլիոն դրամը: Ըստ որոշման, 2019 թվականի համար սահմանված տեղական տուրքի դրույքաչափերի նկատմամբ կիրառվելու են դրույքաչափի նվազեցման հետեւյալ արտոնությունները. 1) Երեւանի վարչական տարածքում հեղուկ վառելիքի, սեղմված բնական կամ հեղուկացված նավթային գազերի վաճառքի թույլտվության համար 2019 թվականի տեղական տուրքի դրույքաչափի 58.33 տոկոսի չափով. 2) Երեւանի վարչական տարածքում առեւտրի օբյեկտներին ժամը 24:00-ից հետո աշխատելու թույլտվության համար 2019 թվականի տեղական տուրքի դրույքաչափի 72.98 տոկոսի չափով. 3) Երեւանի վարչական տարածքում հանրային uննդի եւ զվարճանքի օբյեկտներին ժամը 24:00-ից հետո աշխատելու թույլտվության համար 2019 թվականի տեղական տուրքի դրույքաչափի 70 տոկոսի չափով: Երեւանի ավագանու 2018-ի դեկտեմբերի 25-ին ընդունված համապատասխան որոշմամբ՝ ավելացել էին որոշ տուրքերի դրույքաչափերը: Հայտարարվել էր նաեւ, որ քաղաքում գործող փոքր եւ միջին ձեռնարկությունների ֆինանսական բեռը թեթեւացնելու նպատակով կկիրառվեն արտոնություններ: