«Թող դատարանը որոշում կայացնի՝ տանեք, կանգնեցնեք հրապարակում». ԵԿՄ փոխնախագահ
ԵԿՄ վարչության փոխնախագահ Համլետ Հայրապետյանն այսօր Հայելի ակումբում նշեց, որ առանց դատարանի որոշման պետք չէ ժամանակից առաջ ընկնել ու Մանվել Գրիգորյանին հանցագործ կոչել: «Մեր երկիրը կայացած պետություն է, ու երբ որ դատարանը կորոշի, որ ինչ-որ մեկ անձ հանցագործ է, ես էլի եմ ասում, այդ տեսակ հանցագործներին, ինչպիսին որ մեղսագրվում է հիմա, պետք չէ դատարանով դատել: Թող դատարանը որոշում կայացնի՝ տանեք, կանգնեցնեք հրապարակում: Բայց ես չլինեմ դատողը: Եկեք չդատենք, որ չդատվենք»,- ասաց Համլետ Հայրապետյանը: Այնուհետև ԵԿՄ փոխնախագահը իր ԵԿՄ ընկերներին կոչ արեց միանալ. «Խնդրում եմ բոլորին: Երկրապահի դռները բաց են, տղե՛րք, ձեր ցավը տանեմ, եկե՛ք, բայց գալու ձև կա, գնացեք ձեր բաժանմունքներում հաշվառման կանգնեք, ընտրվեք պատվիրակ, եկե՛ք ժողովների ժամանակ: Հիշե՛ք, թե ինչ եմ ասում. կանոնադրությամբ պատվիրակ ընտրվում են բաժանմունքներում: Պատվիրակը համագումարի ժամանակ որոշում է կայացնում՝ ընտրել վարչություն, որն էլ ընտրում է վարչության նախագահ, ապա առաջադրում է տեղակալների թեկնածությունը: Դեռ ժամանակ կա, գնացե՛ք, հաշվառվեք, եկեք, որպեսզի կարողանանք միասին երկրապահի օջախը շեն պահել»:
Հետևեք մեզ Viber-ում
