Այս խորհրդարանն առավելագույնը 2 տարվա կյանք պետք է ունենա. Պետրոս Մակեյան

7-րդ գումարման Ազգային ժողովից ակնկալիքները շատ են, սերնդափոխությունն, իհարկե լավ է, որը, սակայն, շատ կտրուկ եղավ: Tert.am-ի հետ զրույցում նման տեսակետ հայտնեց «Ժողովրդավարական հայրենիք» կուսակցության ղեկավար Պետրոս Մակեյանը: Ըստ Մակեյանի՝ այս ԱԺ-ն առավելագույնը 2 տարվա կյանք պետք է ունենա. «Պետք է լուծի Սահմանադրության փոփոխության, Ընտրական օրենսգրքի, անցումային արդարադատության, «Կուսակցությունների մասին» օրենքի հետ կապված հարցերը և դրանից հետո, անպայման, պետք է գնա նոր ընտրությունների, հակառակ պարագայում մեր խնդիրները կշատանան»,- ասաց նա: Թե ինչու պետք է կրկին արտահերթ ընտրություններ կազմակերպեն՝ հաշվի առնելով բարձր լեգիտիմությունը, Մակեյանը պատասխանեց. «Իհարկե, լեգիտիմության խնդիր չկա, պետք է հաշվի առնել, որ հետհեղափոխական այս բարձր էյֆորիայի պարագայում ընտրություններն անցան զգացական մակարդակով, և, բնականաբար, երկու տարվա ընթացում իմ ասած հրատապ խնդիրները լուծելուց հետո ճիշտ կլինի արդեն նոր իրավիճակում հանրությանն ավելի սթափ հնարավորություն ընձեռնել ընտրության գնալու»,- ասաց նա: Պետրոս Մակեյանը նշեց, որ համոզված է, որ վարչապետ Նիկոլ փաշինյանը եթե զգաց դրա անհրաժեշտությունը, այս պահին այդ ուղղությամբ գուցե չի մտածել, բայց եթե զգաց դրա անհրաժեշտությունը, կգնա այդ քայլին»,- ասաց նա: Պետրոս Մակեյանը մասամբ համաձայն է, որ քաղաքական դաշտն ինչ-որ առումով մենաշնորհվել է, և եթե նախկինում դա ՀՀԿ-ի կողմից էր, հիմա «Իմ քայլը» դաշինքի: «Նման գնահատականը սուբյեկտիվ կլինի, որովհետև նախկինում դա ժողովրդին պարտադրված էր, հիմա ժողովուրդը հեղափոխության ազդեցության տակ է, արդյունքում ստացվում է նույնը, բայց կամավոր սկզբունքով: Տարբերությունը սա է, և պատկերը կարծես նույնն է ստացվել, արդյունքը՝ նույնը, բայց այն ժամանակ ժողովրդի քվեարկությունը նշանակություն չի ունեցել»,- ասաց նա: Ինչ վերաբերում է այն գնահատականներին, որ ընդդիմադիր և քաղաքացիական հասարակության դաշտերն ամայացել են, Մակեյանը նշեց, որ քաղաքացիական հասարակության դեպքում օբյեկտիվ է համարում, քանի որ դարձան իշխանություն՝ հաշվի առնելով այն, որ հեղափոխությանը ներգրավված էին: «Իսկ ընդդիմության ֆունկցիա կատարում են նախորդ ռեժիմից այսպես ասած սածիլները, օտարվողները»,- ասաց նա: Ըստ Մակեյանի՝ ԱԺ-ում այսօր ընդդիմություն խաղում են, ոչ թե իրական ընդդիմություն են: «Իրենք իրենց կենսակերպով ամբողջ ընթացքում ընդդիմադիր պայքարի մեջ չեն եղել, այդ իմաստով, այո, խնդիրն առկա է, և այդ իմաստով պատասխանը նույնն է՝ երկու տարին առավելագույն ժամկետն է նոր ընտրություններ անցկացնելու և ընդդիմություն ձևավորելու համար»,- ասաց նա: Հարցին, թե տեսնում է արդյոք նախադրյալներ՝ տնտեսական հեղափոխություն իրականացնելու համար, Պետրոս Մակեյանն ասաց, որ դժվար է արագ ակնկալիքներ ունենալ, քանի որ խոր փոսի մեջ ենք հայտնվել: «Ես ասում եմ՝ դժոխքից դուրս ենք եկել, խոր փոսի մեջ ենք հայտնվել, բայց այդ փոսից դուրս չենք եկել, փոսից դուրս գալու առաջին քայլերը կարծես կատարվում են՝ կոռուպցիայի դեմ պայքար, փող չի հավաքվում և տարվում Բաղրամյան 26, այդ ամենը քանդված է, բայց դա բավարար չէ, անելիքները շատ են, անդունդը շատ խորն է, և արագ արդյունքի սպասելը բարդ է, դրա համար պետք է համբերատար լինենք. իհարկե, թերացումներ կան, բայց դրանց անդրադառնալը նշանակում է խանգարել պրոցեսին»,- ասաց նա: