ԻՊ-ի առաջնորդի նախկին կինը մանրամասներ է պատմում

«Իսլամական պետություն» ահաբեկչական խմբավորման առաջնորդ Աբու Բաքր ալ-Բաղդադիի նախկին կինը պատմել է նրա հետ կյանքի մասին: Այս մասին գրում էLenta.ru-ն՝ վկայակոչելով The Independent-ը: «Ես ամուսնացա ընտանիքի նորմալ տղամարդու՝ համալսարանի պրոֆեսորի հետ: Նա աշխատանքի էր գնում եւ տուն վերադառնում՝ ընտանիքի մոտ: Նա ոչ մի «դիմադրության շարժման» չէր մասնակցում: Ինձ համար գաղտնիք է, թե ինչպես նա դարձավ աշխարհի ամենավտանգավոր ծայրահեղական կազմակերպության ղեկավարը»,- պատմել է 28-ամյա Սաջա ադ-Դուլեյմին: Կնոջ խոսքով, իր նախկին ամուսինը շատ խորհրդավոր մարդ է: «Նրա հետ անհնար էր նորմալ խոսել: Ես նրան չէի սիրում, երջանիկ չէի նրա հետ եւ հեռացա: Բացի այդ՝ դա արդար չէր նրա առաջին կնոջ հանդեպ: Նա շատ էր տանջվում»,- նշել է ադ-Դուլեյմին: Սաջա ադ-Դուլեյմիին, որի հետ ալ-Բաղդադին ամուսնացել է 2009 թվականին եւ ապրել ընդամենը 3 ամիս, համարում են աշխարհի ամենահայտնի կանանցից մեկը: Ջիհադականների աշխարհում ազդեցության համար Սաջային Խալիֆեսա են կոչում: Դեմքը չծածկելով հիջաբով՝ նա ամբողջ աշխարհի կանանց կոչ էր անում միանալ ԻՊ-ին՝ նրանց հավատարիմ ամուսիններ եւ արժանապատիվ կյանք խոստանալով: 2014 թվականի ամռանն «Իսլամական պետություն» ահաբեկչական խմբավորումը գրավեց Իրաքի եւ Սիրիայի տարածքների մի մասը եւ այնտեղ խալիֆայություն հռչակեց, իսկ Աբու Բաքր ալ-Բաղդադին խալիֆի տիտղոս ստացավ: