Ինչպես են ձերբակալել Կարագանդայի սկանդալային գործով կասկածյալին

Կարագանդայի ռեստորաններից մեկի մոտ տեղի ունեցած զանգվածային ծեծկռտուքի գործով կասկածյալ, ՀՀ քաղաքացի Նարեկ Գուրուրյանն իր հարազատների մոտ է եղել։ Sputnik Արմենիային այս մասին հայտնեցին Ռուսաստանում Հայաստանի դեսպանատնից։ «Գուրուրյանն անձամբ է երեկ ներկայացել Օմսկ քաղաքի իրավապահ մարմիններին, որտեղ և ձերբակալվել է։ Օմսկ քաղաքում նա եղել է բարեկամների մոտ», – նշեցին դեսպանատանը։ Գուրուրյանը ձերբակալվել է հունվարի 9-ին Օմսկի մարզի տարածքում։ Հիշեցնենք` դեկտեմբերի 31-ի, լույս հունվարի 1-ի գիշերը Ղազախստանի Կարագանդա քաղաքի «Հին Հռոմ» ռեստորանում վիճաբանություն էր տեղի ունեցել, որն ավարտվել էր դանակահարությամբ։ 23-ամյա մի երիտասարդ մահացել էր, ևս երեքը` վնասվածքներ ստացել։ Վեճի մասնակիցների հստակ թիվը հայտնի չէ, բայց, որոշ տվյալների համաձայն, վեճին մի քանի տասնյակ մարդիկ են մասնակցել։