ՌԴ ՊՆ-ն թաքցրել է Սիրիայում հայ զինվորի զոհվելու մասին տեղեկությունը/լուսանկարներ/

13:10 - 10/հունվարի/2019

Ռուսաստանի պաշտպանության նախարարությունը թաքցրել է Սիրիայում հայ զինվորի զոհվելու մասին տեղեկությունը, գրում է BBC-ի ռուսական ծառայությունը՝ լայնածավալ հոդված ներկայացնելով ՌԴ ՊՆ կրտսեր սերժանտ Անդրանիկ Առուստամյանի մասին: Պարբերականի հաղորդմամբ՝ Անդրանիկ Առուստամյանը զոհվել է նոյեմբերի 2-ին Սիրիայում:

ՌԴ Օրենբուրգի շրջանի Տոցկ կոչվող վայրից 2018թ. հոկտեմբերի կեսերին Անդրանիկ Առուստամյանն ուղևորվել էր Սիրիա: Դա նրա երկրորդ զինվորական գործուղումն էր: Հակատանկային ական է պայթել, որը պետք է ռուս զինվորականներին պաշտպաներ պայթուցիկներով զինված մեքենաներից, որոնք ակտիվորեն կիրառում են ԴԱԻՇ ահաբեկչական խմբավորման գրոհայինները:

«Առաջին պատերազմը չէր: Աֆղանստան, Չեչնիա, Ղարաբաղ, իսկ այժմ՝ Սիրիա: Քանի երիտասարդ զոհվեց, քանի զինվորական և սպա չվերադարձավ տուն: Ոչ ոք չգիտեր, թե ինչ կլինի: Միայն Աստված է որոշում»,- պարբերականին ասել է սերժանտի հորեղբայր Սարգիս Առուստամյանը:

Անդրանիկը դպրոցն ավարտելուց հետո բարձրագույն իրավաբանական կրթություն է ստացել Տոցկից 50 կմ հեռավորության վրա գտնվող Բուզուլուկ քաղաքում: Զինծառայության է անցել Բաշկիրիայում: Ապա աշխատել է որպես մենեջեր կենցաղային տեխնիկայի և էլեկտրոնիկայի խանութներում: Սակայն մի պահ եկավ, ինչպես պատմում են նրա եղբայրները, Առուստամյանը հասկացավ, որ իր բարձրագույն կրթությամբ կարող է սպա դառնալ: BBC-ն նշում է, որ ոչ պաշտոնական տվյալները խոսում են այն մասին, որ կորուստներն ավելի շատ կարող են լինել, իսկ Առուստամյանի մահվան փաստի մասին, ինչ-ինչ պատճառներով, որոշել են չբարձրաձայնել: Պարբերականը հայտնում է, որ դեկտեմբերի 18-ին հարցում է ուղարկել ՌԴ ՊՆ, սակայն մինչ այժմ որևէ պատասխան չի ստացել:

ՌԴ ՊՆ-ն թաքցրել է Սիրիայում հայ զինվորի զոհվելու մասին տեղեկությունը. BBC