Նպատակը ամենևին էլ փող խնայելը չէ. Նիկոլ Փաշինյանը՝ նախարարությունների լուծարման մասին

Այսօր կառավարության նիստում ՀՀ վարչապետի պաշտոնակատար Նիկոլ Փաշինյանն անդրադարձավ կառավարության կառուցվածքին ու կազմին: Նա հիշեցրեց, որ նախընտրական խոստում էին տվել՝ փոխել կառավարության կառուցվածքը, և նախարարությունների թիվը պետք է կրճատվի: «Մենք անշեղ պետք է գնանք այդ ճանապարհով»,- ասաց Ն.Փաշինյանը: Նշելով, որ քննարկումներն այդ ուղղությամբ շարունակվելու են վարչապետի պաշտոնակատարը նշել է. «Իհարկե, մենք համոզված ենք, որ պետք է շարժվել այս ճանապարհով և, ըստ էության, ՀՀ քաղաքացիներից ստացել ենք այդ մանդատը: Մենք կլսենք բոլոր տեսակետները, կկայացնենք առավել բալանսավորված որոշում»: Վարչապետի պաշտոնակատարն հատուկ անդրադարձավ Սփյուռքի նախարարարության լուծարմանը եւ նշեց, որ թյուր տպավորություն կա, թե ուզում են «խաչ քաշել» Սփյուռքի նախարարության վրա։ «Ընդհակառակը, խնդիրը սփյուռքի հետ կառավարության հարաբերությունները առավել արդյունավետ դարձնելն է։ Այս առումով մենք որոշակի մոդել և առաջարկ ունենք, որը ենթադրում է, որ Սփյուռքի հետ հարաբերությունների մակարդակը ոչ թե կնվազեցվի, այլ կբարձրացվի և այդ մոդելի վերաբերյալ քննարկումներ կունենանք սփյուռքի ներկայացուցիչների հետ և կհասնենք կոնսեսուսի», - ասաց նա: Ն.Փաշինյանը նշեց, որ կգնան հետևողական, հաստատուն և մտածված քայլերով և արձանագրված լուծումները կապացուցեն իրենց կենսունակությունը և պետք է գոհացնեն այն մարդկանց, որոնք մտահոգ են ՀՀ-ում կառավարման արդյունավետության բարձրացման գործընթացով: