«Ավրորա» մարդասիրական մրցանակի դափնեկիր բժիշկ Քաթինան ամուսնությունը գրանցել է Հայաստանում

ԵՊԲՀ պատվավոր դոկտոր, «Ավրորա» միջազգային մարդասիրական մրցանակի դափնեկիր Թոմ Քաթինան իր ամուսնությունն այսօր պաշտոնապես գրանցել է Հայաստանում, Արդարադատության նախարարության Ամուսնության պալատում։ Այս մասին ֆեյսբուքյան իր էջում հայտնել է ԵՊԲՀ ռեկտոր Արմեն Մուրադյանը՝ երջանկություն մաղթելով համաշխարհային ճանաչում ունեցող բժկին: Թոմ Քաթինան ամերիկացի բժիշկ է, ով 2008 թվականից իր գործունեությունն իրականացնում է Սուդանի Նուբա լեռների Գիդել քաղաքում: Նուբա լեռների շրջանը 2011 թվականից ակտիվ կոնֆլիկտային գոտի է համարվում, և Քաթինան 750.000 բնակչություն ունեցող այս շրջանի միակ վիրաբույժն է: Հիվանդները հաճախ ոտքով ճամփորդում են հասնելու «Գթության Մայր» հիվանդանոց, որտեղ Քաթինան աշխատում է։ Հիվանդանոցային տարածքն զբաղեցնում է Հարավային Կորդոֆանի 1/3-ը, որը տարածքով համարժեք է Ավստրիայի տարածքին: Հիվանդանոցի այցելուներն ունեն տարբեր խնդիրներ՝ կոտրվածքներ, փորլուծություն, վահանագեղձի հիվանդություններ, քաղցկեղ, ինչպես նաև պատերազմի պատճառով զոհեր: Բժիշկը վիրահատություններ է կատարում, բուժումներ նշանակում, ծնունդներ ընդունում: Տեղացիները նրան «Դոկտոր Թոմ» են անվանում, և նա մեծ հարգանք է վայելում շրջապատում: Որպես 435 մահճակալ ունեցող հիվանդանոցի միակ բժիշկ՝ նա աշխատում է օրական 24 ժամ ՝ սպասարկելով կես միլիոն մարդու եւ անտեսելով երկնքից անընդմեջ թափվող ռումբերի մշտական սպառնալիքը։ Քաթինան ինքը հիվանդանոցում աշխատելու առաջին մի քանի ամիսներին երկու անգամ վարակվել է մալարիայով՝ նիհարելով մոտ քսան կիլոգրամ, տասնյակ անգամներ ինքն է արյունի դոնոր դարձել այս կամ այն հիվանդի համար։ Թոմ Քաթինան 2016թ. «Ավրորա» մրցանակի դափնեկիրն է: