Խրախճանք ժանտախտի ժամանակ. լուսանկար

Երեկ ԱԺ նորընտիր պատգամավոր Ալեն Սիմոնյանը Երևանի ակումբներից մեկում նշել է իր ծննդյան օրը։ Այս թեմայի մասին չէի գրի, եթե Ալենի ծնունդն ինձ ավելի շատ հարսանեկան ճոխ խնջույք չհիշեցներ, որին հրավիրված էին հայկական քաղաքական ու էստրադայի վերնախավի առաջին մեծության դեմքեր՝ Արամ mp3-ը, Արա Մարտիրոսյանը, Սրբուկը, իսկ հյուրերի շարքում էին քաղաքապետ Հայկ Մարությանը, Ազգային անվտանգության ծառայության տնօրեն Արթուր Վանեցյանը, ինչպես նաև վարչապետ Նիկոլ Փաշինյանը՝ կնոջ հետ։ Հիմա անցնենք բուն թեմային։ Կա նման հասկացողություն՝ «խրախճանք ժանտախտի ժամանակ»։ Երևի սրա մասին Ալեն Սիմոնյանն իշխանության անցնելուց հետո լրիվ մոռացել էր, որովհետև միանգամից պետք է բացառել, որ չգիտեր․ չէ՞ որ ինքն ու իր թիմակիցները դեռ ամիսներ առաջ ոչ մի առիթ բաց չէին թողնում, որ քննադատեին նախորդներին (երևի արդարացիորեն) միևնույն երևույթի համար, որի կրողը հիմա իրենք են դարձել։ Զարմանում եմ՝ ի՞նչ իմաստ ունի նման ցուցադրական խնջույք կազմակերպել, երբ երկրիդ ժողովուրդը դժվար է ապրում, իսկ դու, բեմի վրա կանգնած, հարուստ օլիգարխի պես ինքնամոռաց պարում ես։ Դա անընդունելի է այն ժամանակ, երբ ձեր թիմն իշխանության է եկել անընդհատ մատնացույց անելով, որ նախկին իշխանությունները դա էին անում, երբ տասնյակ հազարավոր մարդիկ օրվա հացի խնդիր ունեն, ընդ որում՝ վերջին 10 օրերում Ալեն Սիմոնյանենց թիմը շատ ավելի շատ նմանօրինակ խնջույքների հոլովակներ ու լուսանկարներ շռայլեց, քան նախորդ իշխանությունները հասցրել էին անել 10 տարում։ Դուք գալիս էիք իշխանության որպես նոր որակ, որպես համեստության օրինակ, որպես ժողովրդի ցավն ու դժվարություները կիսող թիմ, իսկ այս դեպքում լրիվ հակառակն եք ապացուցում։ Կրկնում եմ՝ նախորդների դեպքում էլ դա ճիշտ չէր, բայց նախորդները գոնե փորձում էին որոշակի կոնֆիդենցիալություն ապահովել ու նվազագույնի հասցնել այդ քեֆերի դետալների հանրայնացումը, իսկ դուք դա էլ չեք անում։ Իհարկե, չենք հաշվելու, թե որքան գումար է ծախսել իր ծննդյան խնջույքի համար Ալեն Սիմոնյանը կամ որքանով է հղում արել իր կարգավիճակի վրա (իսկ դա անել նա շատ է սիրում), բայց այս տեսանյութը նայելուց հետո պարզապես ուզում ես ասել՝ մի քիչ չափավորեք ձեզ և տեսած պահեք, առավել ևս, որ ոչինչ այդքան չի վնասում Նիկոլի վարկանիշին, ինչքան Ալեն Սիմոնյանի ու մյուս ալենսիմոնյանների ցոփուշվայտ ավելորդություններն ու անհեթեթությունները։