Ինչու Օբամային չհաջողվեց Սարգսյան-Ալիև հանդիպում կազմակերպել
ԵԱՀԿ Մինսկի խմբի ամերիկացի համանախագահ Ջեյմս Ուորլիքը հայտարարել է, որ ԵԱՀԿ Մինսկի խումբը Վաշինգտոնի միջուկային անվտանգության 4-րդ գագաթաժողովի շրջանակում չի պլանավորում Հայաստանի և Ադրբեջանի նախագահների հանդիպում: «Ներկա պահին Վաշինգտոնում նախագահների հանդիպման պլաններ չկան: Այդուհանդերձ, մենք պատրաստ ենք նպաստել այս տարի նախագահների միջև ակտիվ երկխոսության անցկացմանը: Մյուս համանախագահների անունից պլանավորում եմ հանդիպում ունենալ կողմերի հետ, որպեսզի քննարկենք Լեռնային Ղարաբաղի հակամարտության կարգավորման գործընթացի ընթացքը»,- ասել է Ուորլիքը: Հիշեցնենք, որ մինչ Սարգսյանի և Ալիևի` Վաշինգտոն կատարելի այցը լրատվամիջոցները քննարկում էին հնարավոր հանդիպումը, հղում կատարելով դիվանագիտական աղբյուրներին, նշում էին, թե Վաշինգտոնի միջուկային գագաթաժողովի շրջանակում Հայաստանի և Ադրբեջանի նախագահների հանդիպումը հավանական է: Վերջին օրերին շփման գծում կրկին լարված իրավիճակ է, իսկ սա նշանակում է, որ Ալիևը մինչև Վաշինգտոն մեկնելը կոնկրետ ճնշումների է ենթարկվում` ոչ միայն Ղարաբաղի հարցում: Նախևառաջ` Ադրբեջանում ժողովրդավարության, մարդու իրավունքների, մամուլի դեմ արշավն է: Ադրբեջանում դեռևս անազատության մեջ են տասնյակ քաղբանտարկյալներ: Միայն վերջերս մի քանի հայտնի իրավապաշտպաններ ու լրագրողներ ազատ արձակվեցին, սակայն սա ակնհայտորեն բավարար չէ Վաշինգտոնի համար: Մյուս կողմից, սրված են ԱՄՆ-Ադրբեջան հարաբերություններն արդեն բավական ժամանակ: Նույնիսկ Ադրբեջանի իշխանություններն էին բացահայտ քննադատությամբ հանդես գալիս` ընդդեմ ԱՄՆ իշխանությունների, ընդդեմ ԵԱՀԿ Մինսկի խմբում ամերիկացի համանախագահի, նրանց բացահայտ մեղադրում էին Հայաստանի շահերը պաշտպանելու մեջ: Ինչպես երևում է, Ալիևը ենթարկվել է Վաշինգտոնի որոշակի ճնշումներին, երկրի ներսում որոշակի քայլեր անելով` մի քանի հայտնի քաղբանտարկյալների ազատելով, որպեսզի Վաշինգտոնում նրա հանդիպումներն ավելի ծանր մթնոլորտում չընթանան: Ու հավանաբար այդ զիջումների դիմաց` Ալիևը պնդել է, որպեսզի Վաշինգտոնում չհանդիպի Սարգսյանի հետ, որպեսզի չքննարկի նրա հետ ղարաբաղյան հիմնախնդիրը: Այստեղ, հավանաբար, դեր խաղացել է նաև Պուտինի գործոնը: Ռուսաստանի նախագահը, պարբերաբար, երբ շփման գծում լարվածությունը հասել է գագաթնակետին, կարողացել է սեղանի շուրջ նստեցնել Սերժ Սարգսյանին ու Իլհամ Ալիևին: Ըստ երևույթին, Վաշինգտոնը չի ցանկանում դուրս գալ Մոսկվայի այս յուրօրինակ «մենաշնորհի» դեմ` թողնելով այդ իրավասությունը Պուտինի ձեռքում: Թամար Բագրատունի