Ալիևի ղարաբաղյան «երազանքը» կատարվեց

Փաշինյանի Մոսկվա մեկնելուց 2 օր առաջ պաշտոնական Բաքուն ղարաբաղյան ուղերձներ է հղել: Ադրբեջանը հուսով է, որ 2019 թվականին Երևանի հետ հարաբերությունները կկարգավորվեն, և պատրաստ է Լեռնային Ղարաբաղում հայերին բարձր մակարդակով ինքնորոշման իրավունք տալ: Այդ մասին երեքշաբթի հայտարարել է Ադրբեջանի արտաքին գործերի նախարար Էլմար Մամեդյարովը: «Մեր երկիրը՝ ինչպես ապահովում է իր քաղաքացիների` այլ էթնիկ խմբերի ներկայացուցիչների անվտանգությունը, նույն կերպ պատրաստ է դա անել Լեռնային Ղարաբաղում հայկական ծագում ունեցող քաղաքացիների համար՝ իր միջազգային պարտավորություններին համապատասխան: Բացի այդ Բաքուն պատրաստ է նրանց բարձր մակարդակի ինքնորոշման իրավունք տալ՝ Ադրբեջանի Հանրապետության միջազգային ճանաչված սահմանների շրջանակում», - նշել է Մամեդյարովը: Նրա խոսքով՝ ղարաբաղյան կարգավորման առաջխաղացումը, «ամբողջ տարածաշրջանում խաղաղության, անվտանգության և կայունության պայմանների ստեղծումը, առաջին հերթին, կբացի հնարավորությունները Հայաստանի տնտեսական աճի համար»: Ադրբեջանի իշխանությունների կողմից Լեռնային Ղարաբաղին Ադրբեջանի Հանրապետության միջազգային ճանաչված սահմանների շրջանակում բարձր մակարդակի ինքնորոշման իրավունք տալու մասին հայտարարվել է վերջին քսան տարիների ընթացքում: Այս հայտարարությունը ևս մեկ անգամ վկայում է այն մասին, որ պաշտոնական Բաքուն ոչ միայն չի փոխել իր քսանամյա դիրքորոշումը, այլև այսօր Հայաստանում իրականացված իշխանափոխությունից հետո կրկին ընդգծում է իր նախորդ դիրքորոշումն՝ ավելի ընդգծված: Կարող է հարց առաջանալ՝ ինչու՞: Պատասխանը պարզ է: Ալիևը որոշել է ցույց տալ, որ նախկին բանակցային պայմանավորվածությունները պարզապես չեն գործում, վերադառնում ենք զրոյական կետի, այսպես ասած՝ «մաքուր էջից»՝ Բաքվի պատկերացրած ղարաբաղյան կարգավորման «տեսլականով»: Սա մի արձանագրում է, որը պետք է նկատի առնեն ներկայիս իշխանությունները, որոնք Դուշանբեի վերելակային «պայմանավորվածություններից» խիստ ոգևորվել են և պատեհ-անպատեհ շեշտում են այդ հանդիպման արդյունքում ձեռքբերված համաձայնությունն ու սահմանային որոշակի անդորրը: Մետաքսյա Շալունց