Նիկոլ Փաշինյանը Սերժ Սարգսյանի ճաշակո՞վ

Նախկին վարչապետ Հովիկ Աբրահամյանն ու իր հարազատները հայտնվել են իշխանության ուշադրության կենտրոնում: Տեւական ժամանակ է Նիկոլ Փաշինյանն իր իրավապահ մ0արմիններով հանգիստ չի տալիս Աբրահամյաններն եւ հարազատներին, գուցե անհավատալի է, բայց նրանք արդեն 18 բնակարան են մտել ինչ-որ ստուգումների զննության պատճառաբանությամբ: Հետաքրքիր է՝ ինչու է Հովիկ Աբրահամյանը տեւական ժամանակ գտնվում իշխանության ուշադրության կենտրոնում, բայց այդպես էլ որեւէ լուրջ բացահայտում նրա եւ նրա հարազատների վերաբերյալ չի կատարվում, մինչդեռ նախկին իշխանության բազում բարձրաստիճաններ կան, որոնց մոտ գնալուն պես հազար գործ կարելի է հարուցել: Մեզ հայտնի է դարձել, որ պատկան մարմինների կողմից ստուգվել է նաեւ Աբրահամյաններին պատկանող կամ նրանց առնչվող 8-9 օբյեկտներ, ստուգումներն անց են կացվել պատեհ-անպատեհ, առանց լուրջ հիմքերի՝ պարբերաբար կաթվածահար անելով այդ կազմակերպությունների աշխատանքը։ Հասկանալի է, որ նոր իշխանությունը «մտնեմ-ստուգեմ, բռնեմ-փակեմ» գծի մեջ է, եւ հանրությանը թամաշայի թարմ տեսարաններ ապահովելու խնդիր ունի, սակայն այդ տեսարանները դիտարժան են եւ ազդեցիկ, եթե ցուցադրվող նյութերը լուրջ են ու հիմնավոր։ Հասկանալի է նաեւ, որ նոր իշխանությունները նախկինների հետ հաշվեհարդարի իրենց փակ օպերացիաներն են վարում, ընդ որում՝ դրանք արվում են խիստ ընտրովի եւ միանշանակ Նիկոլ Փաշինյանի ճաշակով, ու նմանատիպ այցերին, զրույցներին, զգուշացումներին ու նախազգուշացումներին հաջորդում են դրամական հոսքեր, միայն թե պարզ չէ՝ որքանն է գնում պետբյուջե, որքանը Նիկոլ Փաշինյանի անձնական կամ ընտանեկան դրամարկղ։ Բայց այդ ամենը կարելի է անել մեկ կամ երկու այցով, ոչ թե շուրջօրյա հսկողության տակ պահել Աբրահամյանի ընտանիքին ու մերձավորներին։ Մանավանդ, որ Արգամիչը տարիներ առաջ կամուրջներն այրել է նաեւ ՀՀԿ-ի հետ եւ չի կարող կասկածվել նախկին իշխանության հետ համագործակցելու մեջ: Ավելին, նա նույնիսկ անմասն չմնաց Սերժ Սարգսյանի հրաժարականի առաջացրած համընդհանուր ցնծությունից։ Թավշյա իրադարձությունների ժամանակ լրատվամիջոցներից ոմանք նկատել էին, որ Աբրահամյան ընտանիքին պատկանող «Արտաշատ պլազա»-ի աշխատակիցները շատ ակտիվ մասնակցություն են ունեցել երեւանյան բազմամարդ ցույցերին, ավելին՝ նրանց սուպերմարկետի տնօրինությունն է հրահանգել մասնակցել դրանց: Մինչ օրս չի մոռացվել Հովիկ-Աբրահամյան-Սերժ Սարգսյան հեռակա դիմակայությունը՝ «գետեր-առվակներ» թեմայով: Նախկին վարչապետի հրաժարականից կարճ ժամանակ անց Սերժ Սարգսյանը հանդես եկավ գետերի մասին մոնոլոգով, Աբրահամյանն էլ բազմանշանակ արձագանքեց։ Սակայն սրանից զատ Աբրահամյանը շատերի պես չի տիրապետում ֆինանսական վարար հոսքերի, որոնցից կարելի է օգտվել մշտապես։ Ասենք այս հարցում նրան գերազանցում են նախորդ իշխանության օլիգարխներից շատերը, մաքսային-հարկային պետեր, նախարարներ ու փոխնախարարներ։ Եթե ընդունենք, որ նրա ընտանիքը տարիներ ի վեր տնտեսություններ է վարել՝ ձկնաբուծարան, լոլիկի ու խաղողի մշակում, ապա ամենեւին էլ պետք չէ զարմանալ նրա ունեցվածքի վրա։ Թերեւս իշխանությունը լուրջ կասկածներ ունի Հովիկ Աբրահամյանի քաղաքական հավակնությունների հարցում եւ մտածում է, որ Ռոբերտ Քոչարյանի հետ երբեմնի մտերմությունը կարող է Աբրահամյանին դրդել կոնսոլիդացնել քոչարյանական ուժերին եւ անհատներին։ Իսկ սա ինքնին նշանակում է, որ նրա նկատմամբ քաղաքական հետապնդում է իրականացվում, կամ էլ տպավորություն է ստեղծվում, որ Նիկոլ Փաշինյանն առաջնորդվում է Սերժ Սարգսյանի ճաշակով և մինչև վերջ փորձում է  «վնասազերծել» նրա երբեմնի հակառակորդներին: Անի Սահակյան