«Կլասիկ» Վանեցյանն ու ԱԱԾ-ն

Ազգային անվտանգության ծառայության հոբելյարական 100 ամյակը տոնելու պատիվը, փաստորեն, շնորհվեց հեղափոխական իշխանություններին կառույցի տնօրեն Արթուր Վանեցյանին:Նկատենք, որ բավականին խտրական միջոցառում էն կազմակերպել՝ տոնական ցերեկույթին չհրավիրելով նախկիններին՝ սկսած Դավիթ Շահնազարյանից, վերջացրած Գեւորգի Կուտոյանի: Որ ԱԱԾ-ն նորանկախ Հայաստանի մոտ երեսնամյա պատմության ընթացքում ըստ ամենայնի շարունակել է սովետական ԿԳԲ-ի գործը, այդ մասին բարձրաձայնել են նաեւ բոլոր ժամանակների ընդդիմադիրները, հենց այս կոնտիգենտն է եղել ԱԱԾ-ի գործունեության բուն թիրախը, իրենց բազում գործառույթերը թողած, զբաղվել են ընդդիմադիրներին գաղտնալսելով եւ այլն: Բայց, որ թավշյա հեղափոխությունից հետո էլ այս կառույցում փոփոխություններ չէին լինի, դեռ ավելին , այն կդառնար բառի բուն իմաստով քաղաքական մահակ, քչերը կպատկերացնեին: Այսպիսով՝ Նիկոլ Փաշինյանի կողմից ԱԱԾ-ի պաշտոնում նշանակված Արթուր Վանեցյանը պաշտոնավարման յոթ ամիսների ընթացքում Նիկոլ Փաշինյանից հետո դարձել է մեր ժամանակների հերոսը, քանի որ նախկիններից արյան ու վրեժի ծարավ ունեցող ամբոխահաճո գործողություններով է զբաղված: Արտաքի անվտանգության հիմնական գործառույթը արդեն դժվար է ասել, թե որ պլան է մղված, թիրախում միայն ներքին խնդիրներն են, հատկապես նախկին իշխանության բարձրաստիճան այրերին բռնել-փակել, ստուգել, բերման ենթարկելը: Այս մարմինը իր ղեկավարով ամբողջոթյամբ դարձել է վարչապետ Նիկոլ Փաշինյանի քաղաքական քմահաճությունների ու ցանկությունների կատարողը, ինչի ապացույցներից մեկն էլ հայտնի գաղտնալսումն է: Ակտիվ գործողություններին զուգահեռ պարոն Վանեցյանը նույնպես գերակտիվ վիճակներում է ու չի իջնում լրատվամիջոցների էջերից, ինչը բնորոշ չի եղել իր նախորդներին: Վերջապես, նա սովորական բարձրաստիճաններից տարբերվում է իր կարգավիճակով եւ հենց այդ կարգավիճակն է պարտադրում որոշակի զսպվածություն, հատկապես, որ նա առանձնապես չի փայլում իր դիվանագիտական պատասխաններով եւ անկեղծորեն ասում է այն, ինչ կատարվում է: Այդուհանդերձ, քչերի մտքով կանցներ, որ 100-ամյա միջոցառումը եւս կկազմակերպվեր քաղաքական նկատառումներից ելնելով՝ անտեսելով նախկիններին: Ի վերջո, գործունեության մեկ դարի մեջ է մտնում նաեւ 37 թիվը ու այսպիսով ստացվում է, որ Վանեցյանը բոլոր ժամանակների պատասխանատվությունն իր վրա է վերցնում եւ համարում, որ անցած հարյուր տարիների գործունեության ծանր բեռը կարող է միայնակ կրել իր ուսերին: Ի դեպ, որ ԱԱԾ-ն վերջին ամիսներին քաղաքական ուղղվածություն է վերցրել, վկայում է նաեւ ՀՀ-ում ԱՄՆ-ի դեսպանության վերջերս արված հայտարարությունը՝ ուղղված ԱՄՆ քաղաքացիներին, որով դեսպանությունը նրանց զգուշացնում է, որ Հայաստանում կա անդրազգային ահաբեկչության վտանգ.<<Վտանգ կա նաև անդրազգային ահաբեկչական կազմակերպությունների և անհատների գործողությունների առումով, որոնք առաջնորդվում են Եվրոպայում տարածված ծայրահեղական գաղափարախոսությամբ», նշված է հայտարարության մեջ, որն , իսկապես, աննախադեպ է: Անի Սահակյան