Ծուղակ Փաշինյանի համար. Ալիևի ղարաբաղյան «խաղաքարտերը»

Ադրբեջանի արտգործնախարար Էլմար Մամեդյարովը երեկ հայտարարել է, որ Միլանում Հայաստանի արտաքին գործերի նախարար Զոհրաբ Մնացականյանի հետ հանդիպման ժամանակ հասել են փոխըմբռնման։ «Համարում եմ, որ Միլանում իմ հայ գործընկերոջ հետ վերջին հանդիպմանը մենք առաջին անգամ երկար ժամանակահատվածից հետո հասել ենք փոխըմբռնման», - ասել է Էլմար Մամեդյարովը 2018-ի արդյունքներին նվիրված դիվանագիտական կորպուսի ներկայացուցիչների համար կազմակերպված ընդունելությանը, գրում է «Ինտերֆաքսը»։ Նրա խոսքով, ԼՂ հակամարտության խաղաղ կարգավորման ճանապարհների որոնումը Ադրբեջանի համար կշարունակի լինել առաջնահերթ խնդիր։ «Հիմնական նպատակն է՝ հասնել շոշափելի արդյունքների։ 2019-ի հունվարին նախատեսված հանդիպմանը Զոհրաբ Մնացականյանի հետ կքննարկենք խաղաղ կարգավորումը։ Ադրբեջանը խաղաղ կարգավորման կողմնակից է», - նշել է Է.Մամեդյարովը։ Մամեդյարովը նկատի ունի վերջերս Միլանում Մնացականյանի հետ մի քանի ժամանոց հանդիպումը: Բնականաբար, նա չի մանրամասնում, թե մասնավորապես որ հարցերի շուրջ են նրանք եկել «փոխըմբռնման», բայց դա կարևոր չի, առավել կարևոր է, որ Բաքուն ինտենսիվորեն Հայաստանի խորհրդարանական ընտրություններից հետո բացում է ղարաբաղյան «խաղաքարտերը»: Մի կողմից Հայաստանի հետ բանակցություններում հասած «հաջողությունների» մասին են ազդարարում, մյուս կողմից՝ սահմաններում շարժի մասին տեղեկություններ են ի հայտ գալիս: Ադրբեջանը Հայաստանի հետ սահմանի Տավուշի մասն ընդգրկող որոշ հատվածներում բանակի ուժերը փոխարինելու է Պետական սահմանապահ ծառայության ուժերով: Երեկ ՀՀ պաշտպանության նախարարի տեղակալ Գաբրիել Բալայանը նշել է, թե այն, որ Ադրբեջանը Հայաստանի հետ սահմանի Տավուշի մասն ընդգրկող որոշ հատվածներում բանակի ուժերը փոխարինելու է Պետական սահմանապահ ծառայության ուժերով որևէ կերպ չի կարող թուլացնել հայկական կողմի զգոնությունը։ Ինչպես հայտնում է «ԱզերԹաջ»-ը, 2018թ. ամփոփիչ ասուլիսում Պետական սահմանապահ ծառայության պետ, գեներալ-գնդապետ Էլչին Ղուլիևն ասել է, որ, հաշվի առնելով ծառայության ներուժը, նախագահ Իլհամ Ալիևը հանձնարարել է պահպանության վերցնել Հայաստանի և Ադրբեջանի սահմանի Ղազախ-Աղստաֆա հատվածի մարտական հենակետերը: Հայտարարության մեջ չի նշվում, թե ինչ ժամկետներում է դա արվելու: Հայաստանի պաշտպանության նախարարի տեղակալ Գաբրիել Բալայանն «Ազատության» հետ հեռախոսազրույցում նշել է, որ այս թեմայի հետ կապված Պաշտպանության նախարարությունում ունեն տեղեկություն, որն այս պահին հրապարակման ենթակա չէ. - «Այն ինֆորմացիան, որը այս պահին մեր ձեռքի տակ կա, դեռ ենթակա չի հրապարակման»: «Որևիցե կերպով դա մեր պաշտպանողականության վրա չի ազդելու: Մեր ծառայությունը շարունակում է նույն բովանդակությամբ, նույն կարգով, նույն հաճախականությամբ տարվել: Եվ ցանկացած ձևով իրավիճակի հսկողությունը հայկական ուժերի կողմում է շփման գծում: Որևիցե ձևով դա չի կարող ազդել մեր զգոնության, ծառայության կազմակերպման հետ կապված», - հավելեց փոխնախարարը: Տավուշը հայկական կողմից Ադրբեջանի հետ ունեցած ամենաերկար ընդհանուր սահմանն է, և այնտեղի զորքերը պաշտոնական հաղորդագրությամբ որպես ռեզերվ ծառայեցնելու տեղեկությանը կասկածանքով են վերաբերվում հայաստանյան վերլուծաբանները՝ չբացառելով, որ Ղազախի հատվածը ներկայումս սպասարկող Ադրբեջանի ԶՈւ 3-րդ բանակային կորպուսի ենթակայության տակ գտնվող 707-րդ մոտոհրաձգային բրիգադը և նույն բրիգադի հրետանային ուժերը կարող են տեղաշարժվել Լեռնային Ղարաբաղ: Բաքուն, փաստորեն ամրապնդվում է պահուստային զորքերը՝ ղարաբաղա-ադրբեջանական սահմաններում, Հայաստանի հետ սահմաններին: Մյուս կողմից Բաքուն շարունակում ռազմատենչ հայտարարությունները: Ադրբեջանի նախագահ Իլհամ Ալիևի վերջերս հայտարարեց, որ ադրբեջանական բանակի սպառազինությունը թույլ է տալիս ոչնչացնել հակառակորդի ցանկացած օբյեկտ, սակայն Ադրբեջանը կշարունակի նորանոր զինատեսակների ձեռքբերումը: Իսկ Հայաստանի իշխանությունները փոխանակ դատապարտեն Ադրբեջանի նախագահի հայտարարությունները, զգոն լինեն, կարծես չեն են նկատում Ադրբեջանի դիվանագիտական ու ճակատային գործողությունները: Թամար Բագրատունի