Մեկուսացած ու անճար
Առաջիկայում նախատեսվում է Ադրբեջանի, Ռուսաստանի և Իրանի արտգործնախարարներ՝ Էլմար Մամեդյարովի, Սերգեյ Լավրովի և Մոհամադ Ջավադ Զարիֆի հանդիպումը Բաքվում։ Ադրբեջանական APA լրատվական գործակալությունը, վկայակոչելով Ադրբեջանի արտգործնախարարության խոսնակ Հիմքեթ Հաջիևին, նշում է, որ դիվանագիտական ուղիներով այժմ հստակեցվում է հանդիպման օրը։ Հաջիևը նշել է, որ եռակողմ հանդիպման շրջանակներում քննարկվելու են երկկողմ և եռակողմ համագործակցության նախագծեր, այդ թվում՝ Հյուսիս-հարավ ճանապարհային միջանցքին ու փոխադարձ համագործակցությանը վերաբերող այլ հարցեր։ Ըստ Հաջիևի` հանդիպման ժամանակ քննարկվելու են երկկողմ և եռակողմ համագործակցությանն առնչվող նախագծերը, այդ թվում նաև Հարավային գազային միջանցքի հարցն ու փոխշահավետ համագործակցության հարցեր: Նրա խոսքով՝ ներկա դրությամբ դիվանագիտական խողովակների միջոցով հստակեցվում է հանդիպման ժամկետը: Իր հերթին պաշտոնական Մոսկվան ևս հաստատել է Լավրովի` Իրանի և Ադրբեջանի ԱԳ առաջնորդների հետ հանդիպումը: ՌԴ ԱԳ փոխնախագահ Գրիգորի Կարասինը հաստատել է ծրագիրը, ըստ որի՝ պետք է տեղի ունենա ՌԴ ԱԳ նախարար Սերգեյ Լավրովի, Իրանի ԱԳ նախարար Ջավադ Զարիֆի և Ադրբեջանի ԱԳ նախարար Էլմար Մամեդյարովի հանդիպումը. «Այո, այդպիսի հանդիպում ծրագրվում է, եկեք սպասենք դրան»,- ասել է Կարասինը: Այնուամենայնիվ, նա չի կոնկրետացրել, թե մոտավորապես երբ տեղի կունենա հանդիպումը: Ստացվում է այնպես, որ Հայաստանը` լինելով ռուսական տիրույթում, զրկված է Իրանի հետ փոխշահավետ նախաձեռնություններով հանդես գալուց, այլընտրանքային ծրագրերի մասնակցությունից: Ռուսաստանը, հարկ եղած դեպքում, կբանակցի Իրանի հետ գազային ծրագրերի հետ կապված: Մեր հարևանների հետ փոխշահավետ գործարքներ կնքելու մենաշնորհը, փաստացի, թողել ենք Ռուսաստանին, որն էլ ազատ է մեր հարևանների հետ բանակցել այլ ծրագրերի շուրջ` հետապնդելով բացառապես իր երկրի շահերը, ոչ թե ելնել Հայաստանի Հանրապետության շահերից: Թե Ադրբեջանը, թե Վրաստանը, թե Թուրքիան, բոլորն Իրանի հետ լուրջ ծրագրեր են քննարկում, բանակցում: Ռուսաստանն էլ իր հերթին է Իրանի հարթակը ի շահ իր երկրի փորձում օգտագործել: Իսկ Հայաստանում սահմանափակվում են Իրան-Հայաստան հարաբերությունները որերորդ անգամ կարևորելով ընդամենը... Մետաքսյա Շալունց
Հետևեք մեզ Viber-ում
